სახელმწიფო დაცვის სპეციალური სამსახურის უფროსი, ანზორ ჩუბინიძე ადასტურებს რუსთავი 2-ის ინფორმაციას იმის შესახებ, რომ საპატრიარქოს ქონების განკარგვის სამსახურის ხელმძღვანელი, სასულიერო პირი გიორგი მამალაძე დაკავებულია:

"ის რაც შეიძლება გავახმოვანოთ, რა თქმა უნდა იგი არის დაკავებული. სხვა ინფორმაციაზე კომენტარი შესაბამისმა უწყებებმა უნდა გააკეთონ, მე პასუხს ვაგებ უსაფრთხოებაზე".

ანზორ ჩუბინიძე ადასტურებს იმასაც, რომ პატრიარქის დაცვის სამსახურის უფროსმა გამოძიებასთან ითანამშრომლა და პროკურატურაში დაკითხვაზე იმყოფებოდა:

"სოსო ოხანაშვილმა ძალიან კარგი გააკეთა, რომ იგი ჩავიდა და მოეხმარა გამოძიებას და ვფიქრობ, რომ ჩემმა ჩამოსვლამ ხელი შეუწყო ამ სამსახურის ფუნქციონირებას აქ. სოსო განაგრძობს ჩვეულებრივად [მუშაობას] და მასთან კითხვის ნიშნები ამ ეტაპზე არ არსებობს".

სახელმწიფო დაცვის სამსახურის უფროსი აცხადებს, რომ ისინი ბერლინში პატრიარქის უსაფრთხოების შესამოწმებლად ჩავიდნენ:

"ამის საჭიროება არ იყო, მაგრამ ჩვენ მაინც ჩავთვალეთ, რომ პროფილაქტიკური ღონისძიებების მიზნით ჩამოვსულიყავით და პირადად გვენახა მდგომარეობა უსაფრთხოების თვალსაზრისით. ჩამოსვლას ისედაც ვგეგმავდით, პრემიერის ვიზიტთან დაკავშირებით".

ტელეკომპანია რუსთავი 2-ის ინფორმაციით, თბილისის საერთაშორისო აეროპორტში, პარასკევს გამთენიისას საპატრიარქოს ქონების განკარგვის სამსახურის ხელმძღვანელი მამა გიორგი მამალაძე დააკავეს. იგი ასევე საქართველოს საპატრიარქოს წმიდა იოაკიმე და ანას სახელობის სამედიცინო ცენტრის დირექტორია. ტელეკომპანიისვე ცნობით, საქმე სავარაუდოდ ეხება პატრიარქის მოწამვლის მცდელობას, თუმცა, აღნიშნული ინფორმაცია ჯერ ოფიციალურად დადასტურებული არ არის.