დროას დამფუძნებელი, ელენე ხოშტარია TV პირველზე სასამართლოს მიერ მიღებულ გადაწყვეტილებას ეხმაურება და ჟურნალისტებს მხარდაჭერას უცხადებს.

"სოლიდარობა და მხარდაჭერა ტვ1-ს და ყველა იმ ჟურნალისტს, ვინც პირადი რისკის ფასად დაუპირისპირდა სისტემას და კონკრეტული საფრთხეების მიუხედავად ამხილა დანაშაული. სასამართლოს გადაწყვეტილება და პროკურატურის მოთხოვნა შინაარსისგან დაცლილია და ფაქტობრივად აუქმებს ჟურნალისტიკას ამ ქვეყანაში. არ შევეგუებით!", — წერს ხოშტარია ფეისბუქგვერდზე.

სასამართლოს განკარგულების მიხედვით, თუ TV პირველი არ მიაწოდებს ჩანაწერების შესახებ ინფორმაციას საგამოძიებო მოქმედებების ჩამტარებელ პირს ან ორგანოს, მათ უფლება აქვთ წინააღმდეგობის გაწევისას გამოიყენოს იძულების პროპორციული ზომა.

"საგამოძიებო მოქმედებების ჩამტარებელ პირს ან ორგანოს უფლება აქვს წინააღმდეგობის გაწევისას გამოიყენოს იძულების პროპორციული ზომა", — წერია განკარგულებაში.

კითხვით, მისცემენ თუ არა ჩანაწერებს პროკურატურას, On.ge ნოდარ მელაძეს დაუკავშირდა. მისი თქმით, ამისთვის პროკურატურამ შესაბამისი განჩინებით უნდა მიმართოს, ახლა კი "გაურკვეველ კონვერტს" და "ელექტრონულ მატარებელს" ითხოვს. მისივე თქმით, იურისტები უკვე ამზადებენ შესაბამის საპასუხო წერილს, რომელიც პროკურატურას გაეგზავნება.