საქართველოს პრემიერმინისტრის, ირაკლი ღარიბაშვილის განცხადებით, შეზღუდვების შემსუბუქების შემდეგ, "საზოგადოების მხრიდან ყურადღების მოდუნება და რეკომენდაციების უგულებელყოფა" შეინიშნება. ამის შესახებ მან მთავრობის სხდომის დაწყებამდე ისაუბრა.

"მოგეხსენებათ, ჩვენ მთელი რიგი შეზღუდვები მოვხსენით, თუმცა ბოლო დღეებში ვაკვირდებით დინამიკას და გარკვეული მატება შეინიშნება შემთხვევების. ასევე, შეინიშნება საზოგადოების მხრიდან ყურადღების მოდუნება და რეკომენდაციების უგულებელყოფა", — თქვა მან.

ღარიბაშვილის თქმით, ბოლო დღეებში ცნობილი გახდა, რომ პირბადის ტარების მაჩვენებელი "საგანგაშოდ დაეცა", ამიტომ მან მოუწოდა მოსახლეობას, დაიცვან პირბადის ტარების "ელემენტარული და მარტივი" წესები, რომ ქვეყანაში კორონავირუსის მესამე ტალღა არ განვითარდეს.