ქართული ოცნების დეპუტატის, ნოდარ ტურძელაძის განცხადებით, რაზეც ბერა ივანიშვილმა ინტერვიუს დროს ისაუბრა, ყველა ქართველისთვის "გასაგებია". ასე ეხმაურება იგი TV პირველის ჩანაწერების გავრცელების შემდეგ ივანიშვილის პირველ საჯარო პასუხებს.

"ბერამ რაც ისაუბრა, ეს მე მგონი, თითოეული ქართველისთვის, თითოეული კაცისთვის არის გასაგები [...] როცა გვაყენებენ შეურაცხყოფას, როცა ჩვენი ოჯახის წევრს აყენებენ, რა თქმა უნდა, ამაზე გვაქვს რეაქციები, ხომ? ამაზე განმარტებები გააკეთა ბერამ, სხვა რა უნდა გამეგო და დამენახა, ვერ ვხვდები", — თქვა მან.

TV პირველმა 6 მარტს გაავრცელა ჩანაწერები, სადაც, სავარაუდოდ, ირაკლი ღარიბაშვილი, ბერა ივანიშვილი და ანზორ ჩუბინიძე იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში სავარაუდოდ, ირაკლი ღარიბაშვილი და ბერა ივანიშვილი იციანიან. სავარაუდოდ, ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

ჩანაწერების შემდეგ, ბერა ივანიშვილმა 9 მარტს ტელეკომპანია იმედს ინტერვიუ მისცა. მთელი ინტერვიუს განმავლობაში მას ერთხელაც არ უთქვამს, რომ ჩანაწერები ნამდვილი არ არის. მეტიც, აუდიტორიის წინაშე ხმამაღლა განაცხადა, რომ თუ ვინმე დედას შეაგინებს, პასუხს მოსთხოვს. დაადასტურა ბავშვების მშობლებთან მისვლაც, მაგრამ ამტკიცებს, რომ ეს ადამიანები კანონისა და მორალის დაცვით მოინახულეს.

გაიგეთ მეტი: