საქართველოს პარლამენტის ვიცე-სპიკერმა თამარ ჩუგოშვილმა ამერიკის ხმასთან ინტერვიუში აშშ-საქართველოს სამომავლო ურთიერთობაზე ისაუბრა. იგი აშშ-ში პირველი ოფიციალური ვიზიტით იმყოფებოდა, სადაც კონგრესისა და სენატის წარმომადგენლებს შეხვდა. ჩუგოშვილი ინტერვიუში აღნიშნავს, რომ სენატში და კონგრესშიც საქართველოს უპირობო მხარდაჭერას უცხადებენ:

"აბსოლუტურად ყველა ადამიანი, რომლებსაც ჩვენ ვესაუბრებით, ამბობს რომ საქართველო არის ძალიან მნიშვნელოვანი პარტნიორი, ძალიან კარგი პარტნიორი, რომელიც თავდადებითა და სწორად ახორციელებდა სხვადასხვა რეფორმებს, რომლის განხორციელება აუცილებელი იყო, ასევე იმ პროგრამებში, რომლებიც ნატოსთან ერთად ხორციელდებოდა ტერორიზმთან ბრძოლის კუთხით. ჩვენ ძალიან ბევრი მეგობარი გვყავს აქ. ისინი რომლებიც ცალსახად და უპირობოდ აღნიშნავენ, რომ ახალ ადმინიტრაციასთან ხაზს გაუსვამენ, რომ საქართველო უნდა დარჩეს ერთ-ერთ სტრატეგიულ პარტნიორად და არამხოლოდ უნდა დარჩეს, არამედ კიდევ უფრო უნდა გაღრმავდეს და გაძლიერდეს".