CNN-ის ინფორმაციით, პარიზის ტერაქტში ბრალდებული სალაჰ აბდესლამი საფრანგეთის სასამართლოს წინაშე წარსდგა, თუმცა გარდა იმისა, რომ უკმაყოფილება გამოხატა მის საკანში დამონტაჟებული კამერების გამო, მომხდართან დაკავშირებით რაიმე მნიშვნელოვანი არ უთქვამს და სასამართლო სხდომა მალევე დასრულდა.

აბდესლამმა არ განმარტა დუმილის მიზეზი და ასევე არ ისაუბრა პარიზისა და ბრიუსელის ტერაქტებთან დაკავშირებულ იმ ინფორმაციაზეც, რომელიც, როგორც ცნობილია, მან სამართალდამცავებს მისი დაკავების დროს გაუმჟღავნა.

მისი ადვოკატის განმარტებით, აბდესლამი უკმაყოფილოა იმ ფაქტით, რომ მის საკანში 2 ვიდეო კამერაა დამონტაჟებული. თუმცა, მისი თქმით, მას იმედი აქვს, რომ აბდესლამ გამოძიებასთანი ითანამშრომლებს.

გამოძიების ინფორმაციით, აბდესლამი ერთადერთი გადარჩენილია პირია იმ ისლამისტური დაჯგუფებიდან, რომელთა ტერორისტულმა აქტმაც 2015 წლის 13 ნოემბერს პარიზში 130 ადამიანის სიცოცხლე იმსხვერპლა.

იმ შემთხვევაში, თუ აბდესლამი გამოძიებასთან ითანამშრომლებს და მოსამართლის შეკითხვებს უპასუხებს, სასამართლო სხდომა, რომელიც დახურულია, შესაძლოა მთელ დღეს გაგრძელდეს.

ბელგიის მხარემ აბდესლამი საფრანგეთს 27 აპრილს, მას შემდეგ გადასცა, რაც ბელგიაში 2016 წლის მარტში დააკავეს. 28 აპრილს აბდესლამმა მის მიმართ წაყენებული ბრალდებების განხილვაზე უარი განაცხადა და განმარტა, რომ ბელგიიდან საფრანგეთში გადაფრენისგან ძალიან დაიღალა.

აბდესლამი ციხეში განცალკევებულ საკანშია მოთავსებული, სადაც უსაფრთხოების ზომები მაქსიმალურად არის დაცული.