ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე, მიხეილ სარჯველაძე აცხადებს, რომ TV პირველის მიერ გავრცელებულ ჩანაწერებთან დაკავშირებით გამოძიების დასაწყებად უნდა არსებობდეს კონკრეტული წინაპირობები. სარჯველაძის აზრით, საკმარისი საფუძველი არ არსებობს.

"გამოძიებას აქვს კონკრეტული, გარკვეული წინაპირობები, რომლის დაკმაყოფილების შემთხვევაშიც არსებობს საფუძველი გამოძიების დაწყებისთვის. არ მგონია, რომ ამ შემთხვევაში არსებობდეს საკმარისი საფუძველი [...]

ეს არის 2010 და 2011 წლის ჩანაწერებიდან გაკეთებული კომპილაციები. ხო იყო ეს ნათქვამი?! გამოძიებისთვის თუ არსებობს საკმარისი წინაპირობები, ასეთ შემთხვევაში გამოძიება უნდა დაიწყოს. ამ შემთხვევაში არსებობს თუ არ არსებობს, ამას შეაფასებენ. გამოძიება იწყება, როდესაც ვარაუდის საკმარისი ხარისხი არსებობს. ასე არ შეიძლება, რომ ყველაფერზე ხელაღებით ვამტკიცებდეთ, ისე სუბიექტური დამოკიდებულებით, როგორც ამ შემთხვევაში არის საუბარი", — განაცხადა მიხეილ სარჯველაძემ.

შეგახსენებთ, რომ დღეს, პარტია ლელოს ლიდერებმა პროკურატურას ოფიციალური განცხადებით მიმართეს და გამოძების დაწყება მოითხოვეს. კახა კოჟორიძის განცხადებით, პროკურატურა ვალდებულია დაიწყოს გამოძიება მედიაში გავრცელებულ ინფორმაციაზე, რომელიც შეიცავს დანაშაულის ნიშნებს.

TV პირველმა 6 მარტს გაავრცელა ჩანაწერები, სადაც, სავარაუდოდ, ირაკლი ღარიბაშვილი, ბერა ივანიშვილი და ანზორ ჩუბინიძე იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში სავარაუდოდ, ირაკლი ღარიბაშვილი და ბერა ივანიშვილი იციანიან. სავარაუდოდ, ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

ამ დროისთვის უცნობია, ავთენტურია თუ არა ჩანაწერები. ქართული ოცნების რამდენიმე ლიდერმა ჯერ კიდევ გადაცემის ანონსის შემდეგ თქვა, რომ ეს არის "ფაბრიკაცია" და "შეკოწიწებული". თავდაპირველად ჩანაწერის გაკეთების თარიღად მათ 2011 წელი დაასახელეს, შემდეგ კი — 2010. ჩანაწერებს ამ დრომდე არ გამოხმაურებია შინაგან საქმეთა სამინისტრო, მიუხედავად იმისა, რომ ისმის სავარაუდო ძალადობისა და მომავალი ძალადობის გეგმების შესახებ. კომენტარები არ გაუკეთებიათ არც პრემიერმინისტრ ღარიბაშვილსა და ბერა ივანიშვილს.

ჩანაწერების გავრცელებიდან უკვე 24 საათზე მეტი გავიდა, თუმცა პრემიერმინისტრი ამ ამბავს ჯერ კიდევ არ გამოხმაურებია.

გაიგეთ მეტი: