ბუკინგემის სასახლე აცხადებს, რომ სასექსის ჰერცოგინიის, მეგან მარკლის წინააღმდეგ არსებულ ბრალდებებს გამოიძიებს. 2018 წელს კენსინგტონის სასახლე 2-მა დასაქმებულმა დატოვა და მაშინ ბრიტანულ ტაბლოიდებში გაჟღერდა, რომ ისინი მეგანს ბულინგში ადანაშაულებდნენ.

როგორც სასახლის ყოფილი თანამშრომლები ბრიტანულ The Times-თან აცხადებენ, მათ სურთ, რომ საკუთარი ისტორია გააჟღერონ ოპრა უინფრისთან ჰარის და მეგანის ინტერვიუმდე. ისინი ასევე აცხადებენ, რომ მათი საკითხი საფუძვლიანად არ შეისწავლეს.

ოპრა უინფრისთან ჰარისა და მეგანის ინტერვიუ კვირას, 7 მარტს გამოდის და ეს მათი პირველი საჯარო საერთო ინტერვიუა სამეფო ოჯახის დატოვებისა და ამერიკაში გადასახლების შემდეგ.

ბუკინგემის სასახლემ საპასუხოდ განაცხადა, რომ ამ საკითხით შეშფოთებულია და აუცილებლად გამოიძიებს ბრალდებებს, რომლებიც მეგან მარკლის წინააღმდეგ გაჟღერდა.

"სასახლეში დასაქმებული ადამიანების მიმართ ბულინგისა და შეურაცხყოფის ადგილი არ არის და არც არასდროს ყოფილა", — წერია ოფიციალურ განცხადებაში.

ჰარის და მეგანის პუბლიცისტმა კი ბრალდებებს სასექსის ჰერცოგინიაზე თავდასხმის მორიგი ტალღაა უწოდა:

"ეს დამაზიანებელი დეზინფორმაციაა, რომელიც მის რეპუტაციას ლახავს. სევდიანია, რომ ამას მედიაც ხელს უწყობს. ჰერცოგინია მის პიროვნებაზე მორიგ თავდასხმას განიცდის, განსაკუთრებით მაშინ, როდესაც თავად იყო ბულინგის სამიზნე და მხარს უჭერდა ადამიანებს, რომლებსაც ამის გამოვლა უწევდათ".

საინტერესოა ისიც, რომ მსგავს ბრალდებებს ტაბლოიდების საშუალებით პრინცესა დაიანას წინააღმდეგაც აჟღერებდნენ, რომ ის თითქოს ძიძებს უილიამთან და ჰარისთან მიახლოებას უკრძალავდა.

ჰარიმ ცოტა ხნის წინ განაცხადა, რომ სამეფო ოჯახიდან წამოსვლის ერთ-ერთი მიზეზი მენტალური ჯანრმთელობის გაუარესებაც იყო. მისი თქმით, ზუსტად ისე მოიქცა, როგორც ნებისმიერი ქმარი მოიქცეოდა და ასეთ გარემოს თავისი ოჯახი განარიდა. წყვილი ამჟამად კალიფორნიაში ცხოვრობს და მეორე შვილს ელოდება. მან ოპრასთან ინტერვიუში პრინცესა დაიანაც გაიხსენა:

"შვებასა და ბედნიერებას ვგრძნობ, რადგან ჩემი ცოლი ჩემს გვერდითაა, როცა აქ ვზივარ და გესაუბრებით. წარმოდგენაც არ შემიძლია, როგორ გაიარა წლების წინ მთელი ეს პროცესი მან (პრინცესა დაიანამ) მარტომ. ეს ყველაფერი ჩვენთვის წარმოუდგენლად რთული აღმოჩნდა, მაგრამ, სხვა თუ არაფერი, ერთმანეთი მაინც გვყავდა".

2021 წლის თებერვალში მეგან მარკლმა ბრიტანულ ტაბლოიდს პირადი წერილების გამოქვეყნების შესახებ სასამართლო დავა მოუგო, ის მილიონ დოლარზე მეტს ითხოვს. რამდენიმე დღის წინ კი პრინცი ჰარი CBS-ის შოუ, The Late Late Show-ში გამოჩნდა. მან შოუს წამყვან ჯეიმს კორდენთან ერთად სამხრეთ კალიფორნია მოიარა და სხვადასხვა თემის, მათ შორის, სერიალ The Crown-ის შესახებ გულწრფელად ისაუბრა.