კავშირი საფარის განცხადებით, პროკურატურა "შეგნებულად აჭიანურებს" დაზარალებულად ცნოს არასრულწლოვანი და-ძმა, რომელზედაც მამა ძალადობდა. მათი თქმით, მიუხედავად იმისა, რომ არაერთი საჩივარი დაწერეს, უწყებამ ეს საქმე "გაურკვეველი დროით თაროზე შემოდო".

საფარი, რომელიც არასრულწლოვნების ინტერესებს იცავს, ამბობს, რომ მიუხედავად იმისა, შვილებზე მამა ძალადობდა, მან დედის წინააღმდეგ ბავშვებს იძულებით ცრუ ჩვენება მიაცემინა. ქალი დღემდე სასჯელს იხდის.

"მას შემდეგ, რაც არასრულწლოვნები ნეიტრალურ სივრცეში, მინდობით აღმზრდელთან გადაიყვანეს, მათ სიმართლე აღიარეს და განაცხადეს, რომ დედისთვის სასტიკი დანაშაულის დაბრალებას მათ მამა აიძულებდა.

ასევე, არსებობს ლევან სამხარაულის სახელობის სასამართლო ექსპერტიზის ეროვნული ბიუროს დასკვნა, სადაც მითითებულია, რომ ბავშვები არ განიცდიდნენ ფსიქიკურ ტანჯვას დედისგან, ხოლო მამისგან იყვნენ ფსიქოლოგიური ძალადობის ქვეშ", — აცხადებენ ორგანიზაციაში.

საფარის განცხადებით, 2020 წელს არასრულწლოვანი ბავშვების მიმართ მამის მიერ განხორციელებულ სისტემატიურ ძალადობაზე, მამის აღიარების საფუძველზე, თბილისის საქალაქო სასამართლომ მის მიმართ გამამტყუნებელი განაჩენი გამოიტანა, თუმცა მხოლოდ სისხლის სამართლის კოდექსის 11-126 პრიმა მუხლით, რაც ოჯახში ძალადობას გულისხმობს.

"საფარმა მიმართა შუამდგომლობით, დაზარალებული ბავშვებისა და საქმეში შეკრებილი არაერთი მტკიცებულების საფუძველზე, გამოძიება ეწარმოებინათ და საქმე სასამართლოში წარმართულიყო როგორც ძალადობის, ასევე, სისხლის სამართლის კოდექსის 372 მუხლის მე-2 ნაწილით (ჩვენების მიცემის იძულება)", — ამბობენ ორგანიზაციაში.

მათი თქმით, ეს მოთხოვნა არ დაკმაყოფილდა და მართალია, 2020 წლიდან დღემდე, მათ ათეულობით საჩივარი დაწერეს, როგორც ზემდგომ პროკურორთან, ასევე მთავარ პროკურატურაში, საქმეზე საგამოძიებო მოქმედებები არ მიმდინარეობს. საქმის ზედამხედველი პროკურორის, თორნიკე ტყაბლაძის მიმართ შუამდგომლობის მიუხედავად კი, არასრუწლოვანი ბავშვების დაზარალებულად ცნობის შესახებ დადგენილება არ მიუღიათ.

"საფარი დაუყოვნებლივ ითხოვს, პროკურატურამ დაზარალებულად ცნოს ბავშვები, ასევე, გამოიტანოს დადგენილება ბრალდების შესახებ მამის წინააღმდეგ, სისხლის სამართლის კოდექსის 372-ე მუხლით", — აცხადებენ საფარიში.

საფარის ცნობით, აღნიშნულ საქმეს საქმეს სახალხო დამცველი შეისწავლის.