ნაციონალური მოძრაობის ერთ-ერთი ლიდერის, ზაალ უდუმაშვილის განცხადებით, ოფისში მყოფი ადამიანები გაფრთხილებულები არიან, რომ სპეცრაზმის შესვლის შემთხვევაში ადამიანები, რომლებიც აგრესიით იქნებიან პოლიციელების მიმართ განწყობილი, პროვოკატორები არიან და ისინი მათივე ძალებით უნდა გაანეიტრალონ.

"გუშინაც რამდენიმე ადამიანი აღმოვაჩინეთ საეჭვო პირები, რომლებიც გავარიდეთ, ოფისიდან გავიყვანეთ და გავუშვით, მაგრამ ეს არაფერია იმასთან შედარებით, რაც იგეგმება, ანუ ის, რომ პროვოკაციით იყოს გამოწვეული შეტაკება სამართალდამცველებთან, თუმცა ამისთვისაც ვემზადებით ჩვენ. ყველა ადამიანი, ყველა ჩვენი მხარდამჭერი გაფრთხილებული გვყავს, რომ თუ დაიწყება შტურმი და გამოჩნდებიან ადამიანები, რომლებიც აგრესიით იქნებიან განწყობილი პოლიციელების მიმართ, ჩათვალეთ, რომ ის არის პროვოკატორი და ის ჩვენი ძალებითვე უნდა გავანეიტრალოთ, რომ არ მოხდეს შეტაკების პროვოცირება", — განაცხადა მან ფორმულას ეთერში.

პოლიტიკური კრიზისი საქართველოში 2020 წლის საპარლამენტო არჩევნების შედეგების გამოქვეყნების შემდეგ დაიწყო. ოქტომბერში ჩატარებულ არჩევნების შედეგებს ოპოზიცია არ აღიარებს და ხელახალი არჩევნების დანიშვნას თვეებია ითხოვს.

ამას თან დაერთო ნაციონალური მოძრაობის თამჯდომარის, ნიკა მელიასთვის აღკვეთის ღონისძიების სახით პატიმრობა შეფარდება.

მელიასთვის პატიმრობის შეფარდებიდან რამდენიმე საათში 18 თებერვალს საქართველოს პრემიერმინისტრი, გიორგი გახარია გადადგა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.