პარლამენტში პატრიოტთა ალიანსის სიით შესული და აწ უკვე ევროპელი სოციალისტების წარმომადგენელი, დავით ზილფიმიანი ვაქცინაციის დაგვიანების გამო ჯანდაცვის მინისტრს აკრიტიკებს. მისი თქმით, ყველა თითქმის თანაბრადაა ინფორმირებული სხვა ქვეყნებში ვაქცინაციის შესახებ და ცნობილია, რომ უკვე ყველა იმ ქვეყანამ დაიწყო მოსახლეობის აცრა, რომელიც "ოდნავ მაინც იმყოფება პრეტენზიულ ფორმაში, რომ რაღაცას წარმოადგენს". ზილფიმიანი დაინტერესდა, საქართველოში რომელმა უწყებამ გამოიჩინა პასიურობა.

"თქვენ ბრძანეთ, რომ დრო სჭირდება შერჩევას, შეძენას, მოლაპარაკებები, პლატფორმები... გეთანხმებით. მაგრამ ყველაფერი, რაც თქვენ ჩამოთვალეთ, არის საერთო ყველა ქვეყნისთვის, ყველამ ეს უნდა გაიაროს. [...] მე ამას ვუდგები შემდეგნაირად — ფიცი მწამს, ბოლო მაკვირვებსო. ფაქტი სახეზეა, რომ საქართველოში არ დაწყებულა [ვაქცინაცია]. ამას ჩვენ მივიჩნევთ დანაშაულებრივ პასიურობად. თქვენგან მინდა მოვისმინო, მაინც რომელმა უწყებამ გამოიჩინა პასიურობა, რადგან დღეს არცერთი ვაქცინა საქართველოს ტერიტორიაზე არ არის", — განაცხადა დეპუტატმა.

საქართველოს პარლამენტის კომიტეტებში მინისტრობის კანდიდატების მოსმენები მიმდინარეობს. სწორედ ამ პროცესში სვამენ დეპუტატები შეკითხვებს. პარლამენტმა ახალი მთავრობა ხვალ, 22 თებერვალს უნდა დაამტკიცოს. ამ პროცედურის საჭიროება კი მას შემდეგ გაჩნდა, რაც გიორგი გახარიამ პრემიერმინისტრის თანამდებობა დატოვა.