დღეს საქართველოში პოლიტიკური დღის წესრიგი შეიცვალა. გიორგი გახარიამ პრემიერმინისტრის თანამდებობა დატოვა, რომელსაც 2019 წლის 8 სექტემბრიდან დღემდე იკავებდა.

სანამ მმართველმა პარტიამ გუნდიდან ძველი სახეები გამოაჩინა და ირაკლი ღარიბაშვილი კანდიდატურად წარადგინა, ქართულ სტარტაპს უფრო ორიგინალური შემოთავაზება აქვს.

ქარუ პრემიერმინისტრის კანდიდატურად ყველასთვის ცნობილ ბიგლუ აბაშიძეს წარადგენს. ცუგა უკვე წლებია, რაც მომსახურების სფეროშია დასაქმებული და მართვის საკმაოდ საინტერესო სტრატეგია აქვს.

როგორც კომპანიაში აცხადებენ, მათი კანდიდატი სწორედ იმ თვისებებით გამოირჩევა, რომელიც დღევანდელ ქართულ პოლიტიკას სჭირდება.

ერთგული

ბიგლუ ერთგულობით გამოირჩევა. არასდროს გადაუხვევს იმ გზას, რომელიც ქვეყნის ინტერესებს ემსახურება.

პოზიტიური

ზრუნავს სხვებზე და ყველაზე ცუდ დროსაც კი ცხოვრების ნათელ მხარეზე მიგანიშნებთ.

მხიარული

შეუძლებელია, მის გვერდით მოიწყინო. ენერგიის უშრეტი წყაროა და არც მსოფლიო ლიდერებთან შეხვედრებზე შეგვარცხვენს.

არ მიგატოვებს

განსაკუთრებით კრიზისის დროს!

"ბიგლუ პრემიერად! რავი ამაზე კარგი ვარიანტი თუ გაქვთ ვინმეს ჩვენ გავჩუმდებით", — აცხადებენ ქარუში.