"სრულ მზადყოფნაში ვართ სტუმრების მისაღებად", — ასე გამოეხმაურა ნაციონალური მოძრაობის წევრი ზაალ უდუმაშვილი შსს-ს განსაკუთრებულ დავალებათა დეპარტამენტში პოლიციის დანაყოფების შესვლას. უდუმაშვილის თქმით, "შეშინებული ხელისუფლება" ჩქარობს სასამართლოს გადაწყვეტილების სისრულეში მოყვანას.

"არ არის გამორიცხული, რომ დღესვე მოვიდნენ აქ ნიკა მელიას დასაპატიმრებლად, თუმცა მინდა ხაზი გავუსვა, რომ არ ვაპირებთ, ნიკა მელია ხელებაწეულმა ჩავაბაროთ ბიძინა ივანიშვილს და საჩუქარი გავუკეთოთ დაბადების დღეზე. ეს არ ნიშნავს იმას, რომ ვიქნებით აგრესიულები, მაგრამ ჩვენ დავიცავთ თავს", — განაცხადა მან მთავარი არხის ეთერში.

ნაციონალური მოძრაობის ოფისის მიმდებარედ, შსს-ს განსაკუთრებულ დავალებათა დეპარტამენტის ეზოში პოლიციის სხვადასხვა დანაყოფები შევიდა. ტელეკომპანიების გავრცელებულ კადრებში ჩანს, რომ უწყებაში ათეულობით ავტომობილი, პოლიციის ავტობუსები და სამართალდამცავები შევიდნენ.

ამ ეტაპზე უცნობია, ეს არის მობილიზაცია ნიკა მელიას დასაპატიმრებლად, თუ ისევ "ყოველდღიური გადაადგილება". სწორედ ასე განმარტა შინაგან საქმეთა სამინისტრომ დიდი ოდენობით პოლიციელის ყოფნა ამ შენობაში მაშინ, როცა ნიკა მელიას სასამართლო პროცესი მიმდინარეობდა.

ამ წუთებში ნაციონალური მოძრაობის ოფისში ნიკა მელია ოპოზიციური პარტიების ლიდერებთან და მხარდამჭერებთან ერთად იმყოფება. On.ge ცდილობს შსს-სთან დაკავშირებას და გარკვევას, რას უკავშირდება პოლიციელების მობილიზება, მათ პასუხს მიღებისთანავე შემოგთავაზებთ.

შეგახსენებთ, რომ ნიკა მელიას სასამართლო სხდომის პარალელურად, თავდაპირველად ფორმულამ და შემდგომ სხვა ტელევიზიებმა გაავრცელეს კადრები, სადაც სამართალდამცავების გადაადგილება და ყვითელი ავტობუსები ჩანდა. სასამართლოში მელიას ადვოკატებმა მოსამართლეს უთხრეს, რომ ეს ნიშნავდა, რომ პოლიცია მელიას დაკავებას აპირებდა, რაც წინასწარ მიღებულ გადაწყვეტილებაზე მიანიშნებდა. ეს ინფორმაცია პროკურორმა უარყო.

დღისით შინაგან საქმეთა სამინისტროში სამართალდამცავების განსაკუთრებულ მობილიზებას უარყვეს. როგორც უწყებაში On.ge-ს უთხრეს, ეს არის გასაკუთრებულ დავალებათა დეპარტამენტის ბაზა, სადაც თანამშრომლების გადაადგილება ყოველდღიურად ხდება.

ოპოზიციის ლიდერები ამბობენ, რომ ფარად დაუდგებიან მელიას და მისი დაკავების უფლებას არ მისცემენ, რადგან უკანონო გადაწყვეტილებას არ ემორჩილებიან. ისინი ნაციონალური მოძრაობის ოფისში ნიკა მელიასთან ერთად არიან შეკრებილები და მორიგეობას გეგმავენ.

თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.