რუსეთის მოქალაქე, ალექსანდრ ბანდიუკოვი ითხოვს, რომ რუსეთის ხელისუფლებისგან დაიცვან და ექსტრადიციის საფრთხის წინაშე არ დააყენონ. მის განცხადებას ადამიანის უფლებების სწავლებისა და მონიტორინგის ცენტრი (EMC) ავრცელებს. როგორც ორგანიზაციაში ამბობენ, ბანდიუკოვი ამჟამად საავადმყოფოშია.

ბანდიუკოვი თავის მიმართვაში ყვება, რომ რუსეთიდან "პუტინის ბანდიტებს" 2018 წლის სექტემბერში გამოექცა და საქართველოში საერთაშორისო დაცვისთვის ჩამოვიდა. როგორც იგი ამბობს, ხელისუფლებამ მას მხოლოდ ჰუმანიტარული სტატუსი მიანიჭა, რომელიც მიმდინარე წელის იანვარში უკანონოდ და დაუმსახურებლად ჩამოართვეს.

"მე წარმოვადგინე ყველა ის დოკუმენტი, რაც ადასტურებდა ჩემ მიმართ დევნას რუსეთის ფედერაციაში, მთლიანად დავკარგე ჯანმრთელობა განსაკუთრებით მკაცრი რეჟიმის სამარტოო საკანში ყოფნისას. ამ დროის განმავლობაში საერთაშორისო ხელისუფლებამ, კერძოდ ინტერპოლმა, ამომშალა ძებნილთა სიიდან რუსეთის ხელისუფლების მხრიდან თავხედური გაყალბების გამო. ნებისმიერ სხვა დემოკრატიულ ქვეყანაში მე უკვე თავისუფალი ვიქნებოდი", — აცხადებს ბანდიუკოვი.

როგორც იგი ამბობს, საქართველოს ხელისუფლება აპირებს, რომ ის რუსეთს გადასცეს. ბანდიუკოვის თქმით, საფრთხის გამო მას საჩივარი გაეროს ადამიანის უფლებათა კომიტეტშიც შეიტანა:

"მე არ მსურდა საქართველოს წინააღმდეგ საჩივრის შეტანა, ეს გარემოებებმა მაიძულა. მე მიყვარს საქართველო! მიყვარს ქართველი ხალხი! მე მინდა აქ ცხოვრება! სამართლიანობის, სიკეთისა და კანონის სახელით ვთხოვ სამოქალაქო საზოგადოებას, საქართველოს ხალხს, დამიცავით", — აცხადებს ბანდიუკოვი.

იუსტიციის სამინისტროში On.ge-ს განუცხადეს, რომ ამ ეტაპისთვის ბანდიუკოვის ექსტრადირების საკითხი არ მოსულა. ამასთან, უწყებაში განმარტავენ, რომ სამინისტრო არ ერთვება პირისათვის თავშესაფრის მინიჭების პროცედურაში, ამასთან, იუსტიციის სამინისტრო საექსტრადიციო პროცედურებს არ წარმართავს ვიდრე პირს აქვს თავშესაფრის სტატუსი ან ცდილობს თავშესაფრის სტატუსის მოპოვებას ან/და ვიდრე შესაბამისი სასამართლოს მიერ არ არის გადაწყვეტილება გამოტანილი პირის ექსტრადიციის თაობაზე.

ბანდიუკოვის საქმე

EMC-ში ამბობენ, რომ 62 წლის ალექსანდრ ბანდიუკოვი რუსეთის მთავრობის მიმართ კრიტიკული პოზიციებით გამოირჩეოდა. მის წინააღმდეგ რუსეთში თაღლითობისა და ქრთამის ბრალდებით საქმე 2018 წელს აღიძრა. მან ცოლთან ერთად ქვეყანა დატოვა, რადგან პოლიციის მხრიდან ცემისა და სასტიკი მოპყრობის და დევნის მსხვერპლნი გახდნენ.

ორგანიზაციაში განმარტავენ, რომ მისი ჯანმრთელობის მდგომარეობა, რომელიც თავის დროზე ჰუმანიტარული სტატუსის მინიჭების საფუძველი გახდა, არ შეცვლილა და პირიქით გაუარესდა, ამის მიუხედავად კი ბანდიუკოვს სტატუსი შეუჩერეს. გარდა ამისა, EMC-ში ამბობენ, რომ გადაწყვეტილების გამო, ბანდიუკოვის ჯანმრთელობის მდგომარეობა მკვეთრად გაუარესდა და 10 თებერვალს გულის მწვავე შეტევით ჰოსპიტალში გადაიყვანეს.

EMC-ში მიაჩნიათ, რომ საქართველოს ხელისუფლება ბრალდებული პირების ექსტრადირებას ისე უშვებს, რომ არ სათანადოდ არ სწავლობს რუსეთის ციხეებში მდგომარეობას, ასევე საქმის ინდივიდუალურ გარემოებებსა და რისკებს. ამასთან, ისინი ხაზს უსვამენ, რომ იუსტიციის სამინისტრო არ ასაჯაროებს ინფორმაციას უკვე ექსტრადირებული პირების შესახებ.

"ჩვენთვის ფუნდამენტურად მნიშვნელოვანია სახელმწიფომ რადიკალურად გადახედოს სისხლის სამართლის სფეროში რუსეთთან, ისევე როგორც მეზობელ არადემოკრატიულ ქვეყნებთან თანამშრომლობის პრაქტიკას და საკუთარი გადაწყვეტილებები ადამიანის უფლებების დაცვისა და ჰუმანიზმის პრინციპების განუხრელი დაცვისა და პატივისცემის მიდგომებს დააფუძნოს", — აცხადებენ ორგანიზაციაში.