დიტო ცინცაძის საომარი დრამის შინდისის ორიგინალური საუნდტრეკის მოსმენის შესაძლებობა ფილმის გულშემატკივრებს 7 თებერვლიდან აქვთ. საუნდტრეკის ავტორია ქართველი კომპოზიტორი და სტუდია Postred-ის ერთ-ერთი დამფუძნებელი ზვიად მღებრიშვილი, იგივე Zviad Mgebry. საუნდტრეკი კინომოყვარულებისთვის YouTube-ზე, Spotify-სა და Apple Music-ზეა ხელმისაწვდომი. მუსიკა და სრული აუდიო პოსტ ფროდაქშენი Postred-ს ეკუთვნის.

"მუსიკა ბრძოლის ველისა და ქართველი გმირების ოკუპანტებთან თავგანწირული დაპირისპირების ატმოსფეროთია გაჯერებული", — ვკითხულობთ Postred-ის მიერ გამოქვეყნებულ პოსტში.

შინდისის სიუჟეტი 2008 წლის რუსეთ-საქართველოს ომის დროს მომხდარ ტრაგედიას ეფუძნება, რომელსაც 17 ქართველი ჯარისკაცის სიცოცხლე შეეწირა. ფილმი 2019 წელს გამოვიდა. ნამუშევრის იდეის ავტორი ედმონდ აბაშიძე-მინაშვილია, სცენარი კი ირაკლი სოლომონაშვილს ეკუთვნის.

აღსანიშნავია, რომ ფილმმა მაყურებლის სიყვარული მალევე დაიმსახურა და საკმაოდ წარმატებულიც აღმოჩნდა. შინდისი საერთაშორისო სრულმეტრაჟიანი ფილმის ნომინაციაში ოსკარზე იყო წარდგენილი. ვარშავის კინოფესტივალზე ფილმმა ღონისძიების გრან-პრი, დიტო ცინცაძემ კი საუკეთესო რეჟისორის ჯილდო დაიმსახურა. შინდისი ჰოლივუდში გამართული აზიური კინოფესტივალის გამარჯვებულიც გახდა, სადაც დიტო ცინცაძეს საუკეთესო რეჟისორის ჯილდო გადასცეს. თავგანწირვისა და გმირობის თემაზე შექმნილი ნამუშევარი 20 ქვეყნის წარმომადგენლებმა ნახეს.

იანვარში ფილმი სტრიმინგ ფლატფორმა HBO GO-ზე განთავსდა. ფილმის რეიტინგი IMDb-ზე 8,1-ს შეადგენს.

ამავე თემაზე: