ადვოკატთა ასოციაციის თავმჯდომარე, დავით ასათიანი პოლიციის მხრიდან იურისტის საქმიანობაში ხელის შეშლას მიუღებელს უწოდებს. ასათიანი ადვოკატ შოთა თუთბერიძის შემთხვევას გამოეხმაურა, როცა ის პროფესიული საქმიანობის შესრულების დროს დააკავეს.

"ადვოკატები, რომლებიც არიან მართლმსაჯულების სისტემის წარმომადგენლები, ახორციელებენ თავიანთ პროფესიულ საქმიანობას და ამ დროს მათზე ნებისმიერი პირის მხრიდან და რაც სამწუხაროა, სამართალდამცავი ორგანოების წარმომადგენლების მხრიდან ხელშეშლა, ჩარევა და აღარ ვამბობ იმ მდგომარეობაზე, რომ ხელბორკილების დადება, ყველანაირ ზღვარს სცდება, მათ შორის, კოლეგიალობისა და კანონიერების. ეს არის მიუღებელი მოვლენა", — ამბობს ასათიანი.

ადვოკატი შოთა თუთბერიძე ამბობს, რომ თბილისში საპატრულო პოლიციამ 8 თებერვლის საღამოს უკანონოდ, პროფესიული საქმიანობის დროს დააკავა. მას პოლიციის კანონიერი მოთხოვნის დაუმორჩილებლობას ედავებიან. ამჟამად ის ხელწერილის საფუძველზეა გათავისუფლებული და 12 თებერვალს სასამართლოს ელოდება.