აუდიტის სამსახურის ინფორმაციით, ზესტაფონის მუნიციპალიტეტში მოსახლეობის უმრავლესობას წყალი არ მიეწოდება, ხოლო სასმელი წყალი არ იწმინდება და მისი ხარისხი არ მოწმდებოდა. ამის შესახებ ზესტაფონის მუნიციპალიტეტის 2018-2019 წლების საქმიანობის შესაბამისობის აუდიტშია საუბარი.

კერძოდ, მუნიციპალიტეტის 57 სოფელში მცხოვრები 17 611 ოჯახიდან: 2 761 ოჯახს წყალი მიეწოდება მუდმივად; 10 665 ოჯახს წყალი მიეწოდება გრაფიკით; 4 185 ოჯახს წყალი ცენტრალიზებულად არ მიეწოდება და სარგებლობს ჭებითა და წყაროებით

სახელმწიფო აუდიტის სამსახურში აღნიშნავენ, რომ 2018-2019 წელს მუნიციპალიტეტის მიერ განხორციელებული ღონისძიებები არასაკმარისია და წყალმომარაგებისთვის გაწეულია მხოლოდ 210 ათასი ლარის ხარჯი. გარდა ამისა, მუნიციპალიტეტი სასმელ წყალს ლაბორატორიულად არ იკვლევს და არც ხარისხი მოწმდება. ამასთან, ჭები და სათავე ნაგებობები, საიდანაც მოსახლეობას წყალი მიეწოდება, წყლის დაქლორვის საშუალებებით არ არის აღჭურვილი.

დოკუმენტში ვკითხულობთ, რომ წყალმომარაგების პრობლემების მოგვარება მუნიციპალიტეტის მიერ პრიორიტეტად არ არის მიჩნეული, რადგან ამის შესახებ არც 2015 და არც 2020 წლებში მიღებულ სამოქმედო გეგმებშია საუბარი.