ლელოში გაწევრიანებიდან 6 თვეში ქართული ოცნების ყოფილმა დეპუტატმა, ლევან კობერიძემ პარტია დატოვა. ის ლელოს საარჩევნო სიის მე-9 ნომერია. კოვერიძის შეფასებით, პარტიამ ვერ შეძლო ქართულ პოლიტიკაში არსებული ორპოლუსიანობის გარღვევა. მისი თქმით, აზრთა სხვადასხვაბა ამ თემაზე, განსაკუთრებით, არჩევნების შემდგომ პერიოდში ჰქონდათ.

"აზრთა სხვადასხვაობა გვქონდა და იყო, ჩემსა და პარტიის პირველ პირებს შორის, რომელიც, განსაკუთრებით, უფრო მეტად გამოიხატა სწორედ არჩევნების შემდგომ პერიოდში პარტიის მიერ გადადგმული ნაბიჯებით [...]

მე ვთვლი და ყოველ შემთხვევაში, მთელი კამპანიის ძირითად ნაწილში ლელოს პოზიციაც ასეთი იყო, რომ მთავარი იყო ამ ორპოლუსიანობის გარღვევა ქვეყანაში. ორპოლუსიანობის დასრულებისაკენ, ლელოს ჰქონდა ძალიან დიდი შანსი, რომ გადაედგა ნაბიჯები. ჩემი შეერთებაც ლელოს პარტიაში სწორედ, ამ არჩევნებში, იყო ამ მიზეზით გამოწვეული, რომ ჩვენ ერთად გადაგვედგა მსგავს ტიპის ნაბიჯები. თუმცა, სამწუხაროდ, ჩემი შეფასებით, ყოველ შემთხვევაში, ცოტა განსხვავებული სურათის და შედეგის წინაშე აღმოვჩნდი", — აცხადებს კობერიძე რუსთავი 2-ის ეთერში.

კობერიძე აზუსტებს, რომ მისი პარტიიდან წასვლის მიზეზი პარლამენტში შესვლა-არშესვლის საკითხზე უთანხმოება არ ყოფილა.

"პარლამენტში შესვლა-არშესვლა ნამდვილად არ არის ის საკითხი, რომელზეც შეიძლება მსგავსი ტიპის გადაწყვეტილება მიმეღო. მეტსაც ვიტყვი, დღევანდელ პარლამენტში შესვლას და არშესვლას აბსოლუტურად ერთი და იგივე პოლიტიკური ფასი აქვს", — განაცხადა ლევან კობერიძემ.

ლევან კობერიძე იყო მე-9 მოწვევის პარლამენტს წევრი ქართული ოცნებიდან.