ლელოს აზრით, 2022 წლის გაზაფხულზე ბუნებრივი ბარიერით სრულად პროპორციული არჩევნების ჩატარება ყველაზე რეალისტური გამოსავალია. როგორც პარტიის ლიდერი, მამუკა ხაზარაძე აცხადებს, წელს ადგილობრივი არჩევნებია ჩასატარებელი, შესაბამისად, ორი არჩევნების ჩატარება ერთდროულად არარეალურად ეჩვენებათ.

"პარლამენტში მიღებული გადაწყვეტილების შემდეგ კიდევ ერთხელ ვაცხადებთ, ლელო და დანარჩენი ოპოზიცია, რომელსაც გაუყალბეს და მოპარეს არჩევნები, არ აპირებს ამასთან შეგუებას და პარლამენტში შესვლას. ეს დღესავით ნათელი უნდა იყოს მართველი პარტიისთვის, ჩვენ არ ვაპირებთ მათთან ვაჭრობას და უსაგნო მოლაპარაკების გაგრძელებას, თუ არ იქნება შესრულებული ჩვენი მთავარი მოთხოვნა და მიღწეული მთავარი მიზანი ვადამდელი არჩევნების დანიშვნა", — აღნიშნა მამუკა ხაზარაძემ.

31 ოქტომბრის არჩევნების შემდეგ პარლამენტში შესვლაზე ოპოზიციის დიდი ნაწილი კვლავ უარს აცხადებს. მათი მოთხოვნა კვლავ რიგგარეშე არჩევნების ჩატარებაა.

ამჟამად პარლამენტში ორი ოპოზიციური პარტია მოქალაქეები და ევროპელი სოციალისტები არიან, რომლებმაც მანდატები პატრიოტთა ალიანსის სიით მოიპოვეს.

ქართულ ოცნებაში არჩევნების გაყალბებას არ აღიარებენ და ოპოზიციას პარლამენტში შესვლისკენ მოუწოდებენ. მმართველმა გუნდმა უკვე დაიწყო საუბარი დროებითი საგამოძიებო კომისიის შექმნაზე, რომელმაც არჩევნებზე დაფიქსირებული დარღვევები უნდა გამოიკვლიოს.