ევროკავშირის ელჩი საქართველოში, კარლ ჰარცელი ამბობს, რომ იუსტიციის ყოფილი მინისტრის, თეა წულუკიანის მიერ მთავარი არხის დირექტორის, ნიკა გვარამიას ნომრის გასაჯაროების შესახებ მის გუშინდელ განცხადებას კვლავ იზიარებს და იგივე პოზიციაზე რჩება. ამის შესახებ მან წულუკიანთან პარლამენტში შეხვედრის შემდეგ ისაუბრა.

"მივესალმები ასეთ შეხვედრებს. ჩემი აზრით, მნიშვნელოვანია, რომ ასეთი დისკუსიები წარიმართოს. როგორც იცით, ჩემი გუშინდელი განცხადებით ის ნასიამოვნები არ დარჩა, ამიტომ ჩვენ გვქონდა შანსი ეს განგვეხილა და ერთმანეთის პოზიციები გაგვეგო. ამიტომ ბედნიერი ვარ ამ შეხვედრით", — თქვა მან.

დღეს ევროკავშირის ელჩი საქართველოში, კარლ ჰარცელი იუსტიციის ყოფილ მინისტრთან, თეა წულუკიანთან პარლამენტში მივიდა. თეა წულუკიანმა კარლ ჰარცელი პარლამენტში გუშინ მიიწვია და განაცხადა, რომ ისურვებდა გვარამიას ნომრის გასაჯაროების შესახებ ჰარცელის შეფასება განეხილათ. როგორც კარლ ჰარცელმა 3 თებერვალს თქვა, მისთვის ეს "არაეთიკური" იყო.

იუსტიციის ყოფილმა მინისტრმა, თეა წულუკიანმა ნიკა გვარამიას ტელეფონის ნომერი პარლამენტის სხდომაზე გაასაჯაროვა. სიტყვით გამოსვლისას წულუკიანმა პარტია მოქალაქეების ლიდერ ალეკო ელისაშვილს უთხრა, რომ მან "დემოკრატიის მაღალი სტანდარტი" აჩვენა, როცა ტელეფონის ნომერი გამოაცხადა და სურდა, თავისი ნომერიც ეთქვა. წულუკიანმა ურჩია ელისაშვილს ნომერი ჩაეწერა და მერე განაცხადა, რომ ეს არა მისი, არამედ ნიკა გვარამიას ნომერი იყო და ელისაშვილს ურჩია, მისთვის დაერეკა.

ნომრის გასაჯაროების შემდეგ, ნიკა გვარამიამ თქვა, რომ მასთან უცნობი ადამიანების ზარები არ წყდება. მან, სახალხო დამცველს, ნინო ლომჯარიას მიმართა, რათა აღნიშნულ ფაქტს გამოეხმაუროს და დაადგინოს, მისი პირადი ინფორმაციის გასაჯაროება უფლებრივად, რამდენად სწორია.

ნომრის გასაჯაროების საკითხს სახელმწიფო ინსპექტორის სამსახური შეისწავლის. უწყებაში აცხადებენ, რომ პერსონალურ მონაცემთა დაცვის შესახებ კანონის მიზანი ადამიანის პერსონალური მონაცემებისა და პირადი ცხოვრების დაცვაა.