პატრიოტთა ალიანსის სიით პარლამენტში შესული დეპუტატის, დავით ზილფიამიანის განცხადებით, მიაჩნია, ალეკო ელისაშვილისა და ლევან იოსელიანის შესვლა პარლამენტში ერთგვარი მისაბაძი იქნება ზოგიერთი ოპოზიციონერისთვის, ისინი სკუთარ თავში ძალას გამონახავენ, რომ თავი დააღწიონ ბულინგს და შეწყვიტონ საბოტაჟი.

"უპირველეს ყოვლისა, მინდა მივესალმო ჩვენს ორ კოლეგას, რომელიც დღეს პირველი დღეა პარლამენტში შემოვიდა და მიმაჩნია, რომ ეს მეტად მნიშვნელოვანი ნაბიჯი, რამაც გაზარდა ჩვენი ოპოზიციური წარმომადგენლობა პარლამენტში, ერთგვარი მისაბაძი იქნება და გამონახავს ზოგიერთი პოლიტიკოსი თავის თავში ძალას, რომ თავი დააღწიონ ბულინგს და შეწყვიტონ საბოტაჟი. რაც შეეხება საკითხს, რომელიც დღეს განსახილველად გვაქვს და კენჭისყრასთან დაკავშირებით მინდოდა ჩემი პოზიციისთვის კიდევ ერთხელ ხაზი გამესვა — რა თქმა უნდა, დღეს გასაყარზე ვდგავართ და კიდევ ერთხელ მოგიწოდებთ ყველა კოლეგას, გადავდგათ ისეთი ნაბიჯი, რათა არ დაეკეტოს კარი შემოსვლას მომავალში", — განაცხადა ზილფიმიანმა.

დღეს, 2 თებერვალს, პარლამენტის საგაზაფხულო სესია გაიხსნა. პლენარული სხდომაზე განსახილველი ერთადერთი საკითხი ოპოზიციონერი დეპუტატების უფლებამოსილების შეწყვეტაა.

პარლამენტის თავმჯდომარემ, არჩილ თალაკვაძემ 30 იანვარს განაცხადა, რომ ოპოზიციისთვის მანდატების შეწყვეტაზე კენჭისყრა ვერ და არ გადაიდება. მისი თქმით, სურვილი აქვთ, პარლამენტი ისე იყოს წარმოდგენილი, როგორც საზოგადოებამ აირჩია, მაგრამ უკვე 3 თვე გავიდა, იყო არაერთი მოლაპარაკება და ოპოზიციას შესვლის სურვილი არ აქვს.

გუშინ, პირველ თებერვალს ქართული ოცნების პოლიტსაბჭოს სხდომის შემდეგ, პარტიის აღმასრულებელმა მდივანმა, მამუკა მდინარაძემ განაცხადა, რომ ოპოზიციონერი დეპუტატების მანდატებთან დაკავშირებით "მყარად და მკაფიოდ" ჩამოაყალიბეს პოზიცია, რომელსაც მხოლოდ მას შემდეგ გაახმოვანებენ, რაც საპარლამენტო უმრავლესობის წევრები ამ გადაწყვეტილებას დაადასტურებენ, ან უარყოფენ.