საპარლამენტო უმრავლესობის ლიდერი, შალვა პაპუაშვილი აცხადებს, რომ ოპოზიციის მხრიდან საპარლამენტო მანდატებზე უარის თქმა ძირს უთხრის დემოკრატიას და დღეს ქართულ ოცნებას უწევს პასუხი გასცეს ამ ქმედებას.

"რაც შეეხება პირად პოზიციას, ამ შემთხვევაში ვფიქრობ, რომ პირად პოზიციას მნიშვნელობა არ აქვს. აქ მნიშვნელოვანია, როგორც არაერთხელ განვაცხადეთ, მნიშვნელოვანია ის კონტექსტში, რომელ კონექსტში გვიწევს გადაწყვეტილების მიღება. კონტექსტი კი არის შემდეგი — მათ შორის ევროსაბჭოს შეფასებით, ჩვენი ოპონენტების მხრიდან პარლამენტში არშემოსვლა არის დემოკრატიისთვის ძირის გამოთხრა. ახლა ჩვენ გვიწევს გადაწყვეტილების მიღება, რა არის პასუხი ამ ძირგამომთხრელი ქმედებისა", — განაცხადა პაპუაშვილმა.

მისი თქმით, პროცედურულად, საკითხის გადაწყვეტის ბევრი შესაძლებლობა არსებობს და მმართველი პარტია გადაწყვეტს, რომელია მათ შორის ყველაზე ოპტიმალური.

"პროცედურულად გვაქვს ბევრი შესაძლებლობა და ეს პროცესია, რომ ამ შესაძლებლობებიდან ამოვარჩიოთ ყველაზე ოპტიმალური იმისთვის, რომ სათანადო პასუხი გაეცეს დემოკრატიისთვის ძირის გამითხრის მცდელობას", — განაცხადა შალვა პაპუაშვილმა ქართული ოცნების ოფისში შეხვედრის დაწყებამდე.

დღეს, დილიდან, ქართული ოცნების ოფისში პარტიის ლიდერები იკრიბებიან.

გუშინ, ქართული ოცნების პოლიტსაბჭოს სხდომის შემდეგ, პარტიის აღმასრულებელმა მდივანმა, მამუკა მდინარაძემ განაცხადა, რომ ოპოზიციონერი დეპუტატების მანდატებთან დაკავშირებით "მყარად და მკაფიოდ" ჩამოაყალიბეს პოზიცია, რომელსაც მხოლოდ მას შემდეგ გაახმოვანებენ, რაც საპარლამენტო უმრავლესობის წევრები ამ გადაწყვეტილებას დაადასტურებენ, ან უარყოფენ.

დღეს, 2 თებერვალს, პარლამენტის საგაზაფხულო სესია გაიხსნება. პლენარული სხდომაზე განსახილველი ერთადერთი საკითხი ოპოზიციონერი დეპუტატების უფლებამოსილების შეწყვეტაა.

პარლამენტის თავმჯდომარემ, არჩილ თალაკვაძემ 30 იანვარს განაცხადა, რომ ოპოზიციისთვის მანდატების შეწყვეტაზე კენჭისყრა ვერ და არ გადაიდება. მისი თქმით, სურვილი აქვთ, პარლამენტი ისე იყოს წარმოდგენილი, როგორც საზოგადოებამ აირჩია, მაგრამ უკვე 3 თვე გავიდა, იყო არაერთი მოლაპარაკება და ოპოზიციას შესვლის სურვილი არ აქვს.