ცენტრალური საარჩევნო კომისიის განცხადებით, ISFED-ის დღევანდელ პრესკონფერენციაზე დადასტურდა, რომ მათ მონაცემების დამუშავების დრო შესწორების ოქმები არ გაითვალისწინეს და არაზუსტი ინფორმაცია გაავრცელეს. კერძოდ, ცესკოს თქმით, ე.წ. 8%-იან დისბალანსი არ ეფუძნებოდა ერთიან საოქმო მონაცემებს.

"დღეს უკვე, 8 პროცენტიან დისბალანსზე საუბრისას, სამართლიანი არჩევნები აცხადებს, რომ ეყრდნობოდა მხოლოდ პირველად შედგენილ ოქმებს და არ ჰქონდა გათვალისწინებული შესწორების ოქმები, რომელიც დგება კანონმდებლობის საფუძველზე და შემაჯამებელი ოქმის განუყოფელი ნაწილია. ამასთან დაკავშირებით, ცესკომ, საჯარო განცხადების გარდა, 22 იანვარს მიმართა ორგანიზაციას ოფიციალური წერილით და მოითხოვა კიდეც დამატებითი განმარტებები ამ საკითხთან დაკავშირებით. საარჩევნო ადმინისტრაციამ თავად შესთავაზა ორგანიზაციას დაზუსტება იმისა, დათვლის პროცესში გათვალისწინებული იყო თუ არა შესწორების ოქმები", — წერია ცესკოს განცხადებაში.

მათი თქმით, როგორც ორგანიზაციის დღევანდელი განცხადებიდან იკვეთება, მონაცემების დამუშავებისას ISFED-ს არ ჰქონდა შესწორების ოქმები გათვალისწინებული. ცესკოს განცხადებით, აღნიშნული სახით "არასრული, დაუზუსტებელი და არასწორი" ინფორმაციის გავრცელება ეწინააღმდეგება პროფესიულ სტანდარტებს და ტოვებს კითხვის ნიშნებს.

ცესკო აცხადებს, რომ მზად არის კონსტრუქციულ გარემოში ითანამშრომლოს ორგანიზაციასთან ნებისმიერ საკითხზე, იქნება ეს შესწორების ოქმებისა და ახსნა-განმარტებების შედგენის პროცესი თუ შესაბამის პროცედურულ/საკანონმდებლო საკითხები.

ISFED-ში დღეს, 29 იანვარს 2020 წლის საპარლამენტო არჩევნების ხმების პარალელური დათვლის უბნებზე შემაჯამებელ ოქმებში აღმოჩენილ დისბალანსზე განცხადება კიდევ ერთხელ გააკეთეს. სამართლიანი არჩევნების წარმომადგენლების თქმით, მათ ხელახლა გადაითვალეს საპარლამენტო არჩევნების 850 PVT უბანი და აღმოჩნდა, რომ შემაჯამებელი ოქმებში მეტობით დისბალანსი 8%-ს შეადგენდა. მათი განცხადებით, ოქმებში დისბალანსი საარჩევნო ადმინისტრაციამ უმეტესწილად კენჭისყრის დღის შემდეგ გაასწორა.