გირჩის ერთ-ერთ ლიდერი, იაგო ხვიჩია და ქართული ოცნების ერთ-ერთი ლიდერი, მამუკა მდინარაძე ერთმანეთს შეხვდნენ. ამის შესახებ ვახტანგ მეგრელიშვილმა პალიტრანიუსის ეთერში ისაუბრა. მისი თქმით, ხვიჩიას ქართული ოცნებიდან დაუკავშირდნენ და არაფორმალური შეხვედრა 27 ნოემბერს გაიმარა. მეგრელიშვილის განცხადებითვე, ქართულ ოცნებას "გაჭედილი აქვს", რომ არჩევნები არ გაუყალბებია.

"ხომ ვიძახით, რომ შევხვდეთ, შევხვდეთ, გავიცნოთ... გუშინ იაგო შეხვდა ქართული ოცნების წარმომადგენელს, მამუკა მდინარაძეს. ხოდა, ამ საუბრის მთავარი (დეტალებს ვერ მოვყვები, მაგრამ ძირითადად ყველაფერი საჯაროა) ამბავი არის, რომ ქართული ოცნების გადმოსახედიდან, ისინი ფიქრობენ, რომ რაც არ უნდა ნაბიჯი გადადგას ქართულმა ოცნებამ, ოპოზიციის მხარეს არიან ადამიანები, რომლებსაც არავითარ შემთხვევაში არ უნდათ მოლაპარაკება. ამის მაგალითად რა მოგვიყვანეს, იცით? ჩვენი მცდელობა ოპოზიციის შიგნით ლაპარაკის დაწყების. თქვენ რატომ არ გელეპარაკებიან აბაო, ხვდებით?", — განაცხადა მეგრელიშვილმა.

ჟურნალისტის კითხვას, ვინ დაუკავშირდა ხვიჩიას შეხვედრის თაობაზე, მეგრელიშვილი პასუხობს, რომ არ იცის, ამ დროს ეთერში იყო და შეხვედრის შესახებ შემდეგ გაიგო.

"ჩვენ გავცვალეთ პოზიციები. ავუხსენით, ჩვენ რა გვინდა მართლა, რაში ვთვლით, რომ ისინი არ იყვნენ მართლები და მათაც აგვიხსნეს თავიანთი... აი, მაგალითად, რაზეც გაჭედილები აქვთ, რომ არ გაუყალბებიათ არჩევნები. ეს არ არის მარტივი არგუმენტი გადასალახად. როცა მართლა მტკიცებულებაზე მიდის საუბარი, ეს ბუტკაში კი არ ირჩევა რომელიმე ქართული ტელევიზიის, იქ არის ამერიკის საელჩო, ევროკავშირის ელჩი. ამ ხალხს მტკიცებულების სტანდარტზე წარმოდგენა აქვს და არ არის მარტივი მდგომარეობა ამ არგუმენტის გადალახვა", — აცხადებს მეგრელიშვილი.

ჟურნალისტის კითხვას, რაზე აქვს "გაჭედილი" გირჩს, მეგრელიშვილი პასუხობს, რომ უბარიერო პროპორციულ არჩევნებზე.

"დღევანდელი კრიზისის გარდა ჩვენ არ გვექნება შანსი, რომ კონსტიტუცია შევცვალოთ. ამ საკითხთან მიმართებაში გავცვალეთ აზრები და აღებული გვაქვს დრო, რომ მოვიფიქროთ წინადადება, რომელიც შეიძლება კიდევ ერთხელ ვცადოთ რომ გავაჟღეროთ", — თქვა მან და გამოთქვა ოპოზიციასთან შეხვედრის მზაობაც.

ინფორმაცია შეხვედრის შესახებ დღის განმავლობაშიც ვრცელდებოდა, თუმცა მამუკა მდინარაძემ არც უარყო, არც დაადასტურა. იაგო ხვიჩიამ კი მედიასთან აღნიშნა, რომ გირჩს სურს, ეს კონფლიქტი შერიგებით დასრულდეს.

"არის ახლოს რეალობასთან, დაადასტურებენ და შემდეგ მე მზად ვარ. მე არაერთხელ გითხარით, რომ რაღაც სახის კომუნიკაცია, ზოგ შემთხვევაში, სხვა ადამიანების მეშვეობით, ზოგ შემთხვევაში, პირადი შეხვედრებით, ზოგ შემთხვევაში, სატელეფონო საშუალებით, გვაქვს ოპოზიციის ძალიან ბევრ წარმომადგენელთან", — განაცხადა მდინარაძემ.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს და არჩევნების მეორე ტურსაც ბოიკოტი გამოუცხადეს, რომელიც 21 ნოემბერს ჩატარდა. მეორე ტურში არცერთი ოპოზიციური პარტია არ მონაწილეობდა. 17 მაჟორიტარულ ოლქის გარდა მეორე ტური გაიმართა ქუთაისის მერობის არჩევნებზეც. როგორც მოსალოდნელი, ოპოზიციის გარეშე ჩატარებულ არჩევნებში, სახელისუფლებო პარტიამ გაიმარჯვა.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ. ჯერ კიდევ არ არის ცნობილი, გაიმართება თუ არა მოლაპარაკებების მე-5 რაუნდი, რომელიც იანვრის მეორე ნახევარში უნდა გამართულიყო.

გირჩისა და მოქალაქეების ლიდერებს, იაგო ხვიჩიას, ვახტანგ მეგრელიშვილს, ალექსანდრე რაქვიაშვილის, ალეკო ელისაშვილსა და ლევან იოსელიანს საპარლამენტო მანდატებზე უარი არ უთქვამთ, ისინი მოლაპარაკებების დასრულებას ელოდებიან. ალეკო ელისაშვილი და ლევან იოსელიანი უკვე შეხვდნენ არჩილ თალაკვაძესა და მამუკა მდინარაძეს, შეხვედრა პარლამენტში გაიმართა. გირჩის ლიდერები ხშირად საუბრობდნენ ქართული ოცნების წევრებთან შეხვედრისა და მათთან საუბრის სურვილზე.