"მე როგორც ვიცი, ფეიკია ეს [ვიდეო]. ჩაუწერეს სააკაშვილს და მისი სახელით დადეს, ვერ გეტყვით, არასერიოზულია", — ასე უპასუხა იურიდიულ საკითხთა კომიტეტის თავმჯდომარემ, ანრი ოხანაშვილმა ჟურნალისტების კითხვას საქართველოს მესამე პრეზიდენტის, მიხეილ სააკაშვილის მიერ მთავრობისთვის მალტის ვაქცინის შეთავაზებაზე.

"ერთი სერიოზული განცხადება მითხარით რაც თქვა და რაც სიმართლეს შეესაბამება", — ამბობს ქართული ოცნების დეპუტატი.

სააკაშვილი თავის მორიგ ვიდეომიმართვაში მთავრობას სთავაზობს, ვაქცინა მალტას სთხოვოს.

როგორც მან განაცხადა, მალტამ ევროკავშირისგან ერთი მილიონით მეტი ვაქცინა მიიღო, ვიდრე სჭირდებოდა. ახლა კი ის აპირებს, ღარიბ ქვეყნებს გადაუნაწილოს, რომელთა სიაშიც საქართველოც შედის.

მისი მტკიცებით, საქართველოს მთავრობა მალტას იმის გამო არ მიმართავს, რომ კორუფციაში არიან გარეულნი და დიდი რაოდენობით ფული მოიპარეს.

მალტაში საქართველოს ელჩის, კოტე სურგულაძის ინფორმაციით, მალტის შესაბამის უწყებებს ვაქცინების საკითხზე კომუნიკაცია აქვთ საქართველოს საელჩოსთან და ამ საკითხზე სხვა წყაროებიდან გავრცელებული ცნებები სანდო არ არის.

მისივე თქმით, კონსულტაციები ჯერ კიდევ 2020 წლის დეკემბერში დაიწყო და იმ პერიოდისთვის მალტას ვაქცინა ჯერ არ ჰქონია.