პარლამენტის საპროცედურო საკითხთა და წესების კომიტეტმა ნაციონალური მოძრაობის წევრისთვის, ლევან ხაბეიშვილისთვის და ლეიბორისტული პარტიის ლიდერისთვის, შალვა ნათელაშვილისთვის დეპუტატის უფლებამოსილების შეწყვეტას მხარი დაუჭირა.

რაც შეეხება სხვა 49 დეპუტატს ოპოზიციიდან, მათ საკითხზე კომიტეტი 28 იანვარს იმსჯელებს. საბოლოოდ კი, დეპუტატების უფლებამოსილების შეწყვეტაზე კენჭისყრა საგაზაფხულო სესიის პლენარულ სხდომაზე 2 თებერვალს დადგება.

"საპროცედურო კომიტეტმა თავისი პოზიცია დააფიქსირა და მიზანშეწონილად მიიჩნია ამ პარლამენტის წევრების უფლებამოსილების შეწყვეტა. უმრავლესობაში მეტწილად ემხრობიან უფლებამოსილების შეწყვეტას, თუმცა არიან ისეთებიც, რომელთაც განსხვავებული პოზიცია აქვთ. ამიტომ პლენარულ სხდომამდე ჩვენ კიდევ ერთხელ გვექნება შესაძლებლობა, რომ უმრავლესობა შეიკრიბოს და კიდევ ერთხელ განვიხილავთ ამ საკითხს", — განაცხადა სხდომის შემდეგ ქართული ოცნების წევრმა, გაგა კახიანმა.

31 ოქტომბრის არჩევნების შედეგებს ოპოზიციური პარტიები არ აღიარებენ. ერთადერთი, ვინც პარლამენტში შევიდა პატრიოტთა ალიანსის სიის ოთხი დეპუტატია, რომლებმაც ახალი პარტია ევროპელი სოციალისტები ჩამოაყალიბეს. გირჩისა და პარტია მოქალაქეების გარდა, ყველა სხვა ოპოზიციონერმა დეპუტატმა პარლამენტს უფლებამოსილების შეწყვეტისთვის მიმართა.