ე.წ. კარტოგრაფების საქმეზე დაკავებული ივერი მელაშვილის ადვოკატი, გიორგი მშვენიერაძე აცხადებს, რომ გამოძიების განმავლობაში მას საკუთარ კლიენტთან პირისპირ კომუნიკაციის საშუალება არ ჰქონია. TV პირველის ეთერში მშვენიერაძემ განაცხადა, რომ ითხოვს, ადვოკატებს ივერი მელაშვილთან პირისპირ შეხვედრის უფლება მისცენ, რათა ერთად გამოიკვლიონ მტკიცებულებები დაცვის მხარის პოზიციის ფორმულირებისთვის.

"ჩვენ მზად ვართ გავიკეთოთ ტესტები, მიუხედავად იმისა, რომ კოვიდი მოხდილი მაქვს მე თავად, კიდევ ერთხელ გავიტესტო და მივიდე. აღვიჭურვოთ სრულად, უსაფრთხოების წესების დაცვით, ოღონდ, არა ტელეფონით, როგორც გვასაუბრებენ, არამედ მასთან ერთად დაგვსვან მაგიდასთან და მოგვცენ საშუალება გამოვიკვლიოთ მტკიცებულებები პოზიციის ფორმირებისთვის. ჩვენ ამის საშუალება დღემდე არ გვქონია. ივერი მელაშვილთან პირისპირ არ გვისაუბრია, ადვოკატებს, მთელი ამ ხნის მანძილზე", — განაცხადა გიორგი მშვენიერაძემ.

მშვენიერაძე აღნიშნავს იმასაც, რომ ციხეში შესვლა ადვოკატებმა ვერც პროკურატურის მიერ ფარული ჩანაწერების გასაჯაროების დღეს მოახერხეს და შესაძლოა ვერც მომდევნო დღეს, 22 იანვარს მოახერხონ. ამის მიზეზად ადვოკატი ასახელებს იმას, რომ 21 იანვარს გასაჯაროებული მტკიცებულებების შესწავლას დრო სჭირდება.

მშვენიერაძე ფიქრობს, რომ პროკურატურამ დიდი მოცულობის მტკიცებულებები, რომლებიც მათივე თქმით, გასული წლის 28 სექტემბერს მოიპოვეს, 21 იანვარს მხოლოდ იმიტომ გაასაჯაროეს, რომ დაცვის მხარის ადვოკატებს ვერ მოესწროთ მათი სათანადოდ შესწავლა.

"ეს მტკიცებულებები გამოძიებას ჰქონდა მთელი ოთხი თვის მანძილზე და ერთადერთი მიზანი, რატომაც ეს მტკიცებულებები არ გადმოგვცა მხარეს და გამოიყენა ე.წ. მტკიცებულებათა ნაწილის გასაიდუმლოების მექანიზმი, არ იყო დაკავშირებული იმასთან, რომ გამოძიება უკეთ წარიმართებოდა თუ ეს მტკიცებულებები არ იქნებოდა, პირიქით, მისი მიზანი იყო, რომ ბოლოსთვის შემოენახათ დიდი მოცულობით მტკიცებულება, გადმოეცათ ჩვენთვის გამოძიების დასრულების ბოლო დღეს, რომ მასთან მიმართებაში რაიმე ექსპერტიზების დანიშვნა ვერ მოგვეხერხებინა ფიზიკურად, ან სათანადო პოზიციონირება ვერ მოგვეხერხებინა გამოძიების დასრულების ბოლო დღეს", — განაცხადა გიორგი მშვენიერაძემ.

კითხვა იმის შესახებ, რატომ არ ასაჯაროებდა პროკურატურა ფარულ ვიდეო და აუდიო ჩანაწერებს აქამდე, დღეს ივერი მელაშვილის ცოლმა, თამარ სულაძემაც დასვა.

21 იანვარს პროკურატურამ ივერი მელაშვილის კაბინეტში ფარულად გადაღებული ვიდეომასალა გამოაქვეყნა, სადაც ბრალდებულისა და კიდევ ერთი პირის საუბარია აღბეჭდილი. პროკურორ ამირან გულუაშვილის მტკიცებით, ფარულ ჩანაწერებში ბრალდებული ივერი მელაშვილი ადასტურებს, რომ 2006 წლის აგვისტოს შეთანხმებისას დავით გარეჯის მიმდებარედ ქართულმა მხარემ საქართველოს თავდაპირველი პოზიცია უარყო.

გაიგეთ მეტი: