NATO-ს გენერალური მდივნის, იენს სტოლტენბერგის განაცხადებით, რუსეთს არ აქვს უფლება გადაწყვიტოს უკრაინისა და საქართველოს სუვერენული სახელმწიფოები გახდებიან თუ არა როგორც ჩრდილოატლანტიკური ხელშეკრულების ორგანიზაციის წევრები. ინტერფაქს უკრაინის თანახმად, მან მაგალითად საკუთარი ქვეყანა მოიყვანა.

"არც მაშინ მოსწონდა საბჭოთა კავშირს, რომ ჩვენ ნატოს წევრობა გვსურდა. სტალინმა მკაფიოდ აღნიშნა, რომ ნორვეგიის NATO-ში წევრობას ეწინააღმდეგებიან, მაგრამ საბედნიეროდ, პარიზში, ლონდონში, ვაშინგტონსა და ყველგან NATO-ს ლიდერები ამას შეეწინააღმდეგნენ", — აღნიშნა სტოლტენბერგმა პარიზის სამეცნიერო სკოლის საგარეო ურთიერთობათა კონფერენციის მონაწილეებთან ვიდეო საუბრისას.

გენერალურმა მდივანმა ხაზი გაუსვა, რომ პირადად მისთვის სუვერენული სახელმწიფოს მიერ საკუთარი მომავლის გადაწყვეტის უფლების კითხვის ნიშნის ქვეშ დასმა "თითქმის პროვოკაციაა".

"ეს იმის მიღებაა, რომ დიდ ქვეყნებს თავიანთ მეზობლებზე გარკვეული გავლენა ჰქონდეთ, რომ გავლენის სფეროები ისევ განაწილებული იყოს. მე არ მსურს ასეთ მსოფლიოში ცხოვრება, რადგან მე პატარა ქვეყნიდან ვარ, რომელიც დიდ ქვეყანას ემეზობლება. თუ შევთანხმდებით, რომ დიდ ქვეყნებს შეუძლიათ გადაწყვიტონ, რისი გაკეთება შეუძლიათ ან არ შეუძლიათ პატარა მეზობლებს, მაშინ ძველ დროში დავბრუნდებით. ჩვენ არ გვინდა ასეთი სამყარო. ჩვენ გვინდა სამყარო, რომელიც წესებზეა აგებული, სხვა ერების პატივისცემაზე, მათი შეიარაღებული ძალების სიმძლავრისა თუ ეკონომიკის მიუხედავად. ეს ფუნდამენტურია და თუ ჩვენ დავიწყებთ ამაზე კომპრომისის ძიებას, ძალიან საშიშ გზაზე აღმოვჩნდებით იქ, სადაც ყოფნა არ გვსურს", — განაცხადა მან.

სტოლტენბერგმა, ასევე, აღნიშნა, რომ საქართველოს NATO-ში წევრობის სურვილს "რუსეთი ვერ შეაჩერებს".

"გახდება თუ არა საქართველო NATO-ს წევრი, ეს მხოლოდ საქართველოსა და მოკავშირეების გადასაწყვეტია, რადგან ყველაფერი დანარჩენი სუვერენული, დამოუკიდებელი სახელმწიფოს სუვერენული უფლებების შელახვა იქნება. რაც გააკეთა რუსეთის ფედერაციამ, საქართველოს ტერიტორიული მთლიანობისა და დამოუკიდებლობის ხელყოფით, მიუღებელია. იგივე ეხება, რა თქმა უნდა, უკრაინასაც: ყირიმის უკანონო ანექსია, დონბასის დესტაბილიზაცია აღმოსავლეთ უკრაინაში არღვევს ფუნდამენტურ პრინციპებს, რომელთა წყალობითაც ჩვენ მშვიდობიან და სტაბილურ სამყაროს ვქმნით", — განაცხადა მან.

ამავე დროს, სტოლტენბერგმა აღნიშნა, რომ NATO-ს როლი ამ ქვეყნების მხარდაჭერა, მათი შესაძლებლობების განვითარება და სხვადასხვა დახმარების აღმოჩენაა, როგორც საქართველოში, ისე უკრაინაში.