ნაციონალური მოძრაობის ერთ-ერთი ლიდერის, ხატია დეკანოიძის განცხადებით, ალეკო ელისაშვილის პარტია მოქალაქეები ამ პარლამენტში შესასვლელად "არ ემეტება", მაგრამ მისი თქმით, ელისაშვილის ამდენ საუბარს, ჯობია, რომ იგი პარლამენტში შევიდეს.

"არ მემეტება ნამდვილად, არც ალეკო ელისაშვილის პარტია პარლამენტში შესასვლელად, არც თვითონ და არც ლევან იოსელიანი, მაგრამ თუ შესვლა უნდა, ამდენ საუბარს ჯობია, შევიდეს. სინამდვილეში, იქ შესვლა, ორი-სამი ადამიანით, ვერ შეცვლის იმ აღქმას, რაც მოხდა 31 ოქტომბერს", — განაცხადა მან.

დღეს პარტია მოქალაქეებსა და გირჩს შორის ცალკე კონსულტაცია იმართება. ორი ოპოზიციური ძალა, რომელსაც მანდატების გაუქმებაზე ჯერ პარლამენტისთვის არ მიუმართავს, ერთმანეთს ამ წუთებში ხვდება. როგორც ალეკო ელისაშვილმა შეხვედრის დაწყებამდე განაცხადა, იგი მზადაა კონსულტაცია გამართოს ყველა იმ ოპოზიციურ პარტიასთან, ვისაც "გამბედაობა" ეყოფა, რომ "თამამი" გადაწყვეტილება მიიღოს.

საქართველოში 31 ოქტომბერს საპარლამენტო არჩევნები ჩატარდა. პირველი ტური ცხრა პარტიამ გადალახა. მათგან, 8 ოპოზიციურმა ძალამ არჩევნების შედეგები ლეგიტიმურად არ სცნო, მეორე ტურში მონაწილეობა არ მიიღო და მანდატების გაუქმება მოითხოვა. სადეპუტატო უფლებამოსილების შეწყვეტის შესახებ პარლამენტს გირჩისა და მოქალაქეების გარდა ყველა პარტიამ მიმართა. მათ შორის, გირჩი — მეტი თავისუფლების ლიდერმა, ზურაბ ჯაფარიძემაც.

სადეპუტატო უფლებამოსილება ვადამდე შეუწყდა პატრიოტთა ალიანსის 3 წევრს — ირმა ინაშვილს, გიორგი ლომიასა და გოჩა თევდორაძეს. პატრიოტთა ალიანსის სიით მათ ნაცვლად პარლამენტში შევიდნენ დავით ზილფიმიანი, ფრიდონ ინჯია და გელა მიქაძე. პარლამენტში შესვლასთან ერთად მათ პარტია დატოვეს და ახალი პოლიტიკური ძალა — ევროპელი სოციალისტები დააფუძნეს.