ნოვოსიბირსკის ოპერისა და ბალეტის თეატრის (ნოვატ) ოფიციალურ ვებგვერდზე გამოქვეყნებული განცხადების თანახმად, ქართველ პრიმა-ბალერინა, ნინო ანანიაშვილთან კონტრაქტი საბოლოოდ შეწყდა.

"მოლაპარაკებების შედეგად, მხარეების შეთანხმებით, ადრე დადებული ხელშეკრულების შეწყვეტა გადაწყდა", — ნათქვამია განცხადებაში.

9 იანვარს ნოვატში განაცხადეს, რომ ანანიაშვილთან კონტრაქტი შეაჩერეს. მიზეზად ისინი აცხადებდნენ, რომ რიგ მედიასაშუალებებში გამოქვეყნდა ინფორმაცია იმის შესახებ, რომ ნინო ანანიაშვილი საბალეტო დასის ხელმძღვანელად ნოვოსიბირსკის ოპერისა და ბალეტის თეატრშია მიწვეული. თეატრის ხელმძღვანელობამ ჩათვალა, რომ ხელმძღვანელის ვინაობის გასაჯაროება კოლექტივისთვის მის ოფიციალურ წარდგენამდე — დასის უპატივცემლობის უკიდურესი გამოვლინება იყო.

საბოლოო გადაწყვეტილება კი თეატრს იანვრის შუა რიცხვებში თეატრის სამხატვრო ხელმძღვანელის, ვლადიმერ კეხმანისა და ნინა ანანიაშვილის შეხვედრის შემდეგ უნდა მიეღო.

6 იანვარს ცნობილი გახდა, რომ ანანიაშვილი რუსეთში, ნოვოსიბირსკის საბალეტო დასს უხელმძღვანელებდა.

ანანიაშვილი გადაწყვეტილებას პანდემიის გამო შექმნილი ფინანსური მდგომარეობით ხსნიდა. ის აცხადებდა, რომ რუსულთან ერთად ქართულ დასსაც უხელმძღვანელებდა და მსგავსი თანამშრომლობა ბალეტის სფეროში "ჩვეულებრივი რამ არის".