ქუთაისში სასულიერო პირების განცხადებები გააპროტესტეს, რომელიც არასამთავრობო ორგანიზაციებისა და მოქალაქეების ნაწილის მხრიდან ანტისემიტურად შეფასდა. აქციის მონაწილეებს ბანერები ეჭირათ წარწერით "ქუთაისი ანტისემიტიზმის გარეშე".

"სწორედ ამ ქალაქიდან უნდა მოვიხადოთ ჩვენ ბოდიში. იქიდან, სადაც არის იმ საბა კლდიაშვილის სახელობის სკვერი, რომელმაც საკუთარი სიცოცხლე შესწირა ებრაელ ხალხს, სადაც მეოცე საუკუნის დასაწყისში ქუთაისელმა მაყურებელმა სწორედ ანტისემიტური შინაარსის გამო მოსკოვის გასტროლზე სპექტაკლი დატოვა და ჩაშალა", — ამბობს აქციის მონაწილე ფორმულასთან.

ქუთაისი-გაენათის მიტროპოლიტის 20 დეკემბრის ქადაგება არასამთავრობო ორგანიზაციებმა ანტისემიტურად შეაფასეს. თვითონ მიტროპოლიტის განმარტებით, "ურწმუნო მოდგმაში" მართლმადიდებელი ეკლესიის მიმართ კრიტიკულად განწყობილი უფლებადამცველები იგულისხმებიან, ხოლო მის მიერ ქადაგებაში მოყვანილი რელიგიური ანტისემიტიზმის მაგალითები მხოლოდ "ისტორიული ფაქტებია".

4 იანვარს ისრაელის ელჩმა თავის განცხადებაში აღნიშნა, რომ მიტროპოლიტის ეპისკოპოსის ქადაგება "სხვადასხვა ინტერპრეტაციის შესაძლებლობას იძლევა და ზოგიერთი მათგანი განსაკუთრებით შემაშფოთებელია".

მიტროპოლიტის დასაცავად 4 იანვარს მის განცხადებაზე ქადაგებისას ისაუბრა ეპარქიის სხვა სასულიერო პირმა, დეკანოზმა ილია კარკაძემ. როგორც ტოლერანტობისა და მრავალფეროვნების ინსტიტუტი აღნიშნავს, აღნიშნული განცხადებაც ანტისემიტურ განცხადებებს შეიცავდა.

ისრაელის ელჩმა რან გიდორმა აღნიშნა, რომ ქუთაისის სულხან-საბას დასახლების სამების ეკლესიის წინამძღვარმა, დეკანოზმა ილია კარკაძემ "გადმოანთხია" ანტისემიტური შეთქმულების რამდენიმე თეორია, რომელთა ნაწილიც ევროპაში 1930 წლებში "გავრცელებულ ბრალდებებსა და ანტი-ებრაული სიძულვილის პროპაგანდას მოგვაგონებს". ელჩმა მოუწოდა საქართველოს ხელისუფლებას, რომ დაგმონ ანტისემიტური გზავნილები.

აღნიშნულ განცხადების ანტისემიტურ პათოსზე ამჯერად ყურადღება გაამახვილა მიტროპოლიტმა იოანემ, რომლის განცხადებას საპატრიარქოს პრესსამსახურმა გაავრცელა. მაღალიერარქის თქმით, ქადაგება სრულად წარმოადგენს უსაფუძვლო ბრალდებებს ებრაელი ერის ან ცალკეული წარმომადგენლების მიმართ. არ ეფუძნება ეკლესიის სწავლებას და გამსჭვალულია ანტისემიტური პათოსით:

"ამასთან, ქართველებისა და ებრაელების ურთიერთთანადგომით სავსე კეთილმეგობრული მრავალსაუკუნოვანი ურთიერთობა საფუძვლის გარეშე კუსა და მორიელის იგავს არის შედარებული".

მიტროპოლიტის განცხადებით, დეკანოზმა შენიშვნა მიიღო, ხოლო მის მიმართ გამოთქმულ კრიტიკას მან "ანტისემიტიზმის ბრალდებით აგორებული კამპანია" უწოდა.

ელჩის მოწოდების შემდეგ, საქართველოს საგარეო საქმეთა მინისტრმა, დავით ზალკალიანმა ტვიტერზე დაწერა, რომ ანტისემიტიზმის უმცირესი გამოვლინებაც კი ქართველის გონებაში ადგილს ვერ იპოვის.