პარლამენტის დეპუტატი, დავით ზილფიმიანი, რომელმაც მანდატი პატრიოტთა ალიანსის სიით მოიპოვა და ახლა ახალ პარტიას, ევროპელ სოციალისტებს აარსებს, ამტკიცებს, რომ პარლამენტი ერთპარტიული აღარ იქნება.

"პარლამენტი აბსოლუტურად ერთპარტიული დღეიდან აღარ არის. ეს ცალსახაა. ჩვენი კარი ღიაა ყველასთვის, ვინც ჩვენს მოსაზრებებს იზიარებს. ჩვენი ტრენდი გასაგებია, ყველამ იცის რა ტრენდიც გვაქვს, ხოლო გეგმებსა და წესდებაზე ისაუბრებს თავმჯდომარე", — განაცხადა მან.

პატრიოტთა ალიანსის ყოფილი წევრების, დავით ზილფიმიანის, ფრიდონ ინჯიასა და გელა მიქაძის სადეპუტატო მანდატები უკვე ცნეს და ისინი პარლამენტში შევიდნენ. როგორც ფრიდონ ინჯიამ შემდეგ განმარტა, პარლამენტში შესვლა იმიტომ გადაწყვიტეს, რომ "ოპონირება" გაეწიათ ქართული ოცნებისთვის.

დეპუტატმა მაშინვე განაცხადა, რომ პარლამენტში შესვლასთან ერთად ისინი პატრიოტთა ალიანსს ტოვებენ და ახალ პოლიტიკურ პარტიას ევროპელ სოციალისტებს წარადგენენ.

4 იანვარს პატრიოტთა ალიანსის სიის სამ წევრს — ირმა ინაშვილს, გიორგი ლომიასა და გოჩა თევდორაძეს — პარლამენტმა სადეპუტატო უფლებამოსილება შეუწყვიტა. რაც შეეხება სიის მეოთხე ნომერს, ავთანდილ ენუქიძეს მან მანდატზე უარი არ თქვა და პარლამენტში შევიდა. პატრიოტთა ალიანსის ის დეპუტატები კი, რომელთაც უარი თქვეს მანდატებზე, დავით ზილფიმიანმა, ფრიდონ ინჯიამ და გელა მიქაძემ ჩაანაცვლეს.

ამ წუთებში მიმდინარეობს ახალი პარტიის დაარსების ყრილობა, რომელსაც ზემოთ ხსენებული დეპუტატები ქმნიან.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.