ფინანსთა სამინისტროს შემოსავლების სამსახურის ხელმძღვანელობის გადაწყვეტილებით, უწყება ბავშვთა სამყაროში ხანძრის შედეგად დაზარალებულ მოქალაქეებს განადგურებულ სასაქონლო-მატერიალური ფასეულობებს ჩამოაწერს. ამის შესახებ ინფორმაციას უწყების პრესსამსახური ავრცელებს.

საქართველოს ფინანსთა მინისტრის მოადგილის, ლაშა ხუციშვილის თქმით, შემოსავლების სამსახურმა მოქმედება უკვე დაიწყო:

„ჩვენ გუშინვე მოვახდინეთ აღნიშნულ ფაქტზე რეაგირება. შემოსავლების სამსახურის თანამშრომლები ადგილზე იყვნენ გასული, გაეცნენ პრობლემის შინაარსს. მას შემდეგ, რაც მოხდება განადგურებული პროდუქციის მოცულობის და ზიანის დადგენა, ფინანსთა სამინისტროს შემოსავლების სამსახური მოახდენს სასაქონლო-მატერიალური ფასეულობების ჩამოწერას დაზარალებულ გადასახადის გადამხდელებზე, რათა მათ აღნიშნულ განადგურებულ საქონელზე საგადასახადო ვალდებულებები აღარ წარმოექმნათ".

ლაშა ხუციშვილის განცხადებით, შემოსავლების სამსახური შემდგომ პერიოდში თითოეული დაზარალებული გადამხდელის საგადასახადო ვალდებულებას ინდივიდუალურად შეისწავლის და ისე მიიღებს საბოლოო გადაწყვეტილებას, რომ მათ სამომავლო საქმიანობაში პრობლემები არ შეექმნათ.