ფინანსთა მინისტრმა, ივანე მაჭავარიანმა განაცხადა, რომ ისინი, ვინც სამსახური 2020 წლის დეკემბერში ან 2021 წლის იანვარ-თებერვალში დაკარგა, 200 ლარიან დახმარებას მიიღებს.

"მსგავსი პაკეტი იყო გაზაფხულზე. იგივე პაკეტი გაგრძელდება 1 დეკემბრიდან და იქნება 6 თვის განმავლობაში. თუ ადამიანმა სამსახური დაკარგა 2020 წლის დეკმებრში ან 2021 წლის იანვარში-თებერვალში, მიიღებს 6 თვის განმავლობაში ყოველთვიურად 200 ლარს", — განაცხადა მაჭავარიანმა.

მისივე თქმით, დახმარების პაკეტი, ასევე, მოიცავს იმ პირებს, ვინც 2020 წლის 1 იანვრიდან 2020 წლის ნოემბრის ჩათვლით 2 თვე მაინც მუშაობდა და 200 ლარიან დახმარებას ისინიც მიიღებენ.

გარდა ამისა, მაჭავარიანმა აღნიშნა, რომ ამ პირების შესახებ ინფორმაცია დამსაქმებლებმა ყოველი თვის 20 რიცხვის ჩათვლით უნდა მიაწოდონ ფინანსთა სამინისტროს შემოსავლების სამსახურს. მომხმარებელს შესაძლებლობა ექნება თავად გადაამოწმოს არის თუ არა მისი მონაცემები ასახული კომპენსაციის მიმღებთა სიაში.