თავდაცვის სამინისტროს განცხადებით, რეორგანიზაციის პროცესი დასრულებულია და მთლიანობაში თავდაცვის უწყება 2250-მდე ადამიანმა დატოვა.

როგორც სამინისტრო გავრცელებულ განცხადებაში წერს, სამოქალაქო ოფისიდან გათავისუფლდა:

  1. შტატგარეშე - 400;
  2. შტატიანი - 1350;

სულ 1750 სამოქალაქო პირი.

შეიარაღებული ძალებიდან სამხედრო პირები:

  1. ოფიცერი - 217;
  2. სერჟანტი - 123;

სამინისტრიოს ცნობით, სულ გათავისუფლდა 340 სამხედრო, ხოლო მათზე გასაცემი კომპენსაციის მთლიანმა თანხამ 5 მილიონ 197 ათას 500 ლარი შეადგინა.

თავდაცვის სამინისტრო წერს, რომ კომპენსაციების განაკვეთი წოდებების მიხედვით განისაზღვრა:

  • ლეიტენანტი, უფროსი ლეიტენანტი - 10 ათასი ლარი;
  • კაპიტანი - 14 ათასი ლარი;
  • მაიორი -18 ათასი ლარი;
  • ვიცე-პოლკოვნიკი - 23 ათასი ლარი;
  • პოლკოვნიკი - 29 ათასი ლარი.

სამინისტროს ცნობით, თავდაცვის უწყებაში მიმდინარე რეორგანიზაციისა და ოპტიმიზაციის შედეგად ამ დროისთვის დაზოგილი თანხის მოცულობა შეადგენს 32 მილიონ ლარს.

უწყების განცხადებაში ნათქვამია, რომ ოპტიმიზაციის პროცესი თავდაცვის სამინისტროში მმართველი რგოლიდან დაიწყო, რაც მრჩეველთა ინსტიტუტის გაუქმებაში გამოიხატა:

"მხოლოდ ამ გადაწყვეტილებით, დაიზოგა 389 556 ლარი, რომელიც მინისტრის და მისი მოადგილეების 10 მრჩევლის წლიურ ანაზღაურებას შეადგენდა. მრჩევლების შტატი გაუქმდა გენერალურ შტაბსა და ქვესტრუქტურებშიც. რის შედეგადაც მთლიანობაში 1 მილიონ ლარზე მეტი თანხა დაიზოგა".

ასევე, სამინისტროს განცხადებით, გასულ წელს, თავდაცვის სამინისტროს 670 მილიონიან ბიუჯეტში 67 პროცენტი მხოლოდ სახელფასო და სოციალურ ხარჯებზე მოდიოდა, ხოლო 33 პროცენტი ტექნიკის, ტყვია-წამლის და სხვა საჭიროებებზე იყო გათვლილი.

საქართველოს თავდაცვის სამინისტროში რეორგანიზაციის პროცესი 2016 წლის სექტემბრიდან დაიწყო.