ლელოს თავმჯდომარე, მამუკა ხაზარაძე აცხადებს, რომ პარტიას პირდაპირი, ინდივიდუალური მოლაპარაკება მმართველ პარტიასთან არ ჰქონია. ხაზარაძე ქართული ოცნების აღმასრულებელი მდივნის, ირაკლი კობახიძის განცხადებას იმის შესახებ, რომ მათ ინდივიდუალური მოლაპარაკებები აქვთ ოპოზიციური პარტიების უმრავლესობასთან, პოლიტიკურ ხრიკს უწოდებს.

"ნეტაი გვესაუბრებოდნენ და ძალიან ღიად მოვუყვებით საზოგადოებას რას გვეტყოდნენ და რას ვუპასუხებდით ჩვენ. ასეთი ბედნიერება ჩვენ არ გვქონია, ბრჭყალებში ბედნიერება, ბუნებრივია.

ეს არის ტიპური ხრიკია, რომ საზოგადოებას უთხრან, რომ იცი რა, ჩუმ-ჩუმად ვიღაცები დადიან. არ ვიცი ახლა ვინ დადის ქართულ ოცნებასთან, ეს მათ ანგარიშზე და სინდისზე იყოს, მაგრამ, ჩვენი მოლაპარაკება, ლელოს მოლაპარაკება, ხდება მხოლოდ ფასილიტატორების მეშვეობით, ჩვენი უცხოელი მეგობრების ჩართულობით. არანაირი დამოუკიდებელი საუბრები, არც სატელეფონო და არც რაღაცა, ლელოს მხრიდან არ ყოფილა და არც იქნება", — განაცხადა მამუკა ხაზარაძემ რუსთავი 2-ის ეთერში.

ქართული ოცნების აღმასრულებელმა მდივანმა, ირაკლი კობახიძემ გუშინ, ღამის კურიერის ეთერში განაცხადა, რომ ოპოზიციური პარტიების უმრავლესობასთან ფასილიტატორი ელჩების გარეშეც ჰქონდათ კომუნიკაცია.

"მე შემიძლია გითხრათ, რომ ამ პარტიების უმრავლესობასთან სხვადასხვა ტიპის კომუნიკაცია შედგა [...] ეს კომუნიკაცია შედგა უმრავლესობასთან ამ პარტიების, ანუ, უმრავლესობა არის მინიმუმ ხუთი რვიდან", — განაცხადა ირაკლი კობახიძემ.

კობახიძის თქმით, ინდივიდუალური მოლაპარაკებების გამართვა მმართველ პარტიასა და ცალკეულ ოპოზიციურ პარტიებს შორის საერთაშორისო პარტნიორების მოწოდებაც იყო.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.