ჟურნალისტი ეკა ხოფერია აფხაზეთის ავტონომიური რესპუბლიკის განათლებისა და კულტურის მინისტრად დაინიშნა. როგორც მან On.ge-ისთან საუბრისას აღნიშნა, ეს შემოთავაზება აფხაზეთის ავტონომიური რესპუბლიკის მთავრობის თავმჯდომარე, რუსლან აბაშიძისგან მიიღო.

"დიახ გიდასტურებთ დაახლოებით ორი საათის წინ დავინიშნე აფხაზეთის ავტონომიური რესპუბლიკის განათლებისა და კულტურის მინისტრად, შეიძლება ითქვას, რომ დღეს იქნება ჩემი წარდგენა და შესაბამისად პირველი სამუშაო დღეც. ამ შემოთავაზებას წინ უძღოდა საერთო პროექტი, ჩემს ჟურნალსა და აფხაზეთის ავტონომიური რესპუბლიკის მთავრობასთან. სავარაუდოდ ამ პროექტის შემდეგ გაჩნდა იდეა, დამიკავშირდნენ, შემომთავაზეს და მეც დავთანხმდი", — ამბობს ეკა ხოფერია.

ხოფერიამ აღნიშნა, რომ ჯერ გეგმები არ აქვს და დღეიდან იწყებს მუშაობას. გაანალიზებული აქვს, რომ ძალიან მნიშვნელოვან სფეროებს აერთიანებს ეს სამინისტრო და საჭიროა ფიქრი.