იუსტიციის ყოფილი მინისტრისა და ამჟამად პარლამენტის წევრის, თეა წულუკიანის განცხადებით, დღეს თანამედროვე ქართველი მეცენატები ჰყავს საქართველოს და ესენია, ქართული ოცნების აღმასრულებელი მდივანი, ბიძინა ივანიშვილი და მისი ოჯახი. წულუკიანის თქმით, "მავნებლურ ტრენდად" დამკვიდრდა, რომ მათზე მადლობის თქმა სირცხვილია.

"გაგვიქრა მადლიერების განცდა და მადლობის თქმა არის სირცხვილი. ეს არ არის ჩემი პარტიული გამოსვლა ამ ნაწილში, მაგრამ დღეს თუ ჩვენ გვყავს დიდი ქართველი მეცენატები, ეს არის ბატონი ბიძინა ივანიშვილი და მისი ოჯახი, თუკი მათ ახსენებ და ეტყვი მადლობას, მავანს სურს რომ დაამკვიდროს მავნებლური ტრენდი, რომ ეს საერთოდ რა არის? სირცხვილადაც უნდა იყოს მადლობის თქმა ცნობილი. არადა იმ სფეროში, რა სფეროშიც მე და ჩემი კოლეგები კომიტეტში ვართ, ამ სფეროში სწორედ ის არის და მისი ოჯახი თანამედროვეობის ყველაზე დიდი ქართველი მეცენატი და ის თანხები, რაც მილიარდობით ამ სფეროში ამ ოჯახმა ჩადო, ასევე, საერთაშორისო დონორებმა ჩადეს, ქართველმა ხალხმა ჯიბიდან ამოიღო და ჩადო ბიუჯეტში, ჩვენი ვალია, რომ ეფექტიანად გამოვიყენოთ", — განაცხადა მან.

დღეს პარლამენტში მთავრობას უსმენენ. ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროექტს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.