ქართული ოცნების დეპუტატის, ნინო წილოსანის თქმით, როცა მმართველ პარტიას "უპასუხისმგებლო ოპოზიციის" გამო მარტო უწევთ ოპონირება, ვალდებულები არიან, რომ "გაცილებით კრიტიკულები" იყვნენ. ამის შესახებ მან პარლამენტში მთავრობის დამტკიცების სხდომაზე განაცხადა.

"ჩვენ, როდესაც გარკვეული უპასუხისმგებლო ოპოზიციის გამო გვიწევს ერთი პარტიის ფორმატში თქვენთან ოპონირება, ვალდებულები ვართ, რომ გაცილებით კრიტიკულები ვიყოთ. ამ კრიტიკის ნაწილში მინდა გითხრათ, რომ მიწის რეფორმა, რომელიც ჩვენი კომიტეტის მეშვეობით დაიწყო და 2019 წელს ძალიან მნიშვნელოვანი მიწის კანონით დასრულდა, არ მიმდინარეობს სათანადოდ", — განაცხადა წილოსანმა.

დღეს პარლამენტში მთავრობას უსმენენ. ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროექტს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.