პრემიერმინისტრობის კანდიდატ გიორგი გახარიას განცხადებით, სასმელი წყლის წესრიგში მოყვანა სისტემური პრობლემაა. გახარიას თქმით, თუ ინფრასტრუქტურა შედარებით არ მოწესრიგდა, ისევე როგორც სასმელი, ასევე, საირიგაციო წყალი სულ უფრო და უფრო სისტემური პრობლემა გახდება.

"უამრავი სოფლებია საქართველოში, მათ შორის დასავლეთ საქართველოში აღმოსავლეთს რომ თავი დავანებოთ, სადაც ნორმალურ სასმელ წყალზე წვდომა პრობლემაა. ჩვენ თუ უახლოეს წლებში ამ პრობლემის მოგვარება არ დავიწყეთ, წყლის ექსპორტი კი არა, ჩვენ თვითონ ჩვენი მოქალაქეების წყლით მომარაგება გაგვიხდება პრობლემა", — განაცხადა გახარიამ პარლამენტში, ფრაქცია ქართული ოცნების წევრებთან შეხვედრისას.

მისივე თქმით, 3-4 წლის განმავლობაში ძირითადი პრობლემა მოსახლეობის ხარისხიანი სასმელი წყლით მომარაგება იქნება.

დღეს პარლამენტში ფრაქცია ქართული ოცნების სხდომა მიმდინარეობს. ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროეტქს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.