შინაგან საქმეთა მინისტრის მოვალეობის შემსრულებელი და კანდიდატი ვახტანგ გომელაური ამბობს, რომ რუსი ჟურნალისტი საქართველოში კანონის დარღვევით არ შემოსულა. მისი თქმით, მაქსიმ შევჩენკოს პასპორტში არ ჰქონდა შტამპი, რომელიც დაადასტურებდა, რომ მან ოკუპაციის კანონი დაარღვია და აფხაზეთში იყო.

ამავდროულად, მინისტრი ამბობს, რომ აქვთ ოპერატიული ინფორმაცია, რომლის მიხედვითაც, შევჩენკო ოკუპირებულ აფხაზეთში 2009 წელს იმყოფებოდა. თუმცა, მისი განმარტებით, საქართველოს კანონი აძლევს უფლებას ოკუპაციის კანონის დამრღვევს, 6 წლის შემდეგ საქართველოში შემოსვლა შეძლოს და შევჩენკოს შტამპი რომც ქონოდა, შემოსვლაზე უარს ვერ ეტყოდნენ.

"ეს ადამიანი შემოვიდა კანონის სრული დაცვით. ბევრი ადამიანი შემოდის, ბიზნესმენია, რეგისტრირდება და შემოდიან ჩვეულებრივად. რაც შეეხება შტამპს, რომელიც ოკუპაციის შესახებ კანონდარღვევას დაადგენდა, არაფერი არ იყო, პირველ რიგში. მეორეც, როცა მოვიძიეთ ჩვენ ოპერატიულად, არაოფიციალურად, ეს ადამიანი 2009 წელში იყო ნამყოფი აფხაზეთში. შტამპი რომც ქონოდა, ჩვენივე კანონით 6 წლის შემდეგ შეუძლია ამ ადამიანს რომ შემოვიდეს და ეს აღარ ითვლება დანაშაულად. ანუ შტამპიც რომ ქონოდა, მაინც უფლება არ გვქონდა, რომ არ შემოგვეშვა, თუმცა არანაირი შტამპი არ ჰქონდა, შემოვიდა სრული კანონის დაცვით", — განაცხადა მან.

რუსი ჟურნალისტი, მაქსიმ შევჩენკო ამბობს, რომ საქართველოში ხელისუფლების მოწვევით იმყოფებოდა. თავდაპირველად, ქართულ ოცნებაში განაცხადეს, რომ არ იციან, ვინ არის მაქსიმ შევჩენკო და არც ის იციან, რა მიზნით იმყოფებოდა საქართველოში. მოგვიანებით, მმართველი გუნდის დეპუტატმა, ბექა დავითულიანმა თქვა, რომ რუსი ჟურნალისტი საქართველოში ბიზნესმოწვევით იმყოფებოდა.

ამავე თემაზე: