ქართული ოცნების ერთ-ერთი ლიდერის, მამუკა მდინარაძის განცხადებით, სამინისტროების, მათ შორის, კულტურის სამინისტროს გაყოფასთან დაკავშირებით, მსჯელობა უკვე დიდი ხანია მიმდინარეობს. თუმცა მისი თქმით, კონკრეტული გადაწყვეტილებები ჯერ არ მიუღიათ.

"რატომღაც ბოლო დღეებში ტელევიზიებში წამოიწია ნარატივი, რომ მხოლოდ რამდენიმე დღეა დავიწყეთ ამაზე საუბარი. უკვე რამდენიმე წელიც კია, მსგავს საკითხებზე საუბარი მიდის, მათ შორის, კულტურის სამინისტროსთან დაკავშირებით, უნდა იყოს თუ არა ცალკე უწყებად. ეს საუბარი ცხარე შიდა კამათის ფონზე მას შემდეგ მიმდინარეობს, რაც ეს უწყებები შეერთდა. მსჯელობა არის, ამას გიდასტურებთ, მაგრამ კონკრეტული გადაწყვეტიელბა ამაზე არ არის. და როდესაც გადაწყვეტილება უწყებასთან დაკავშირებითაც არ არის მიღებული, ძალიან ადრეა საუბარი კონკრეტულ პირებზე", — განაცხადა მდინარაძემ.

იუსტიციის ყოფილმა მინისტრმა და მე-10 მოწვევის პარლამენტის განათლების, მეცნიერებისა და კულტურის კომიტეტის თავმჯდომარემ, თეა წულუკიანმა, მთავრობაში შესაძლო სტრუქტურულ ცვლილებებსა და მისი კულტურის მინისტრად დანიშვნის შესახებ გავრცელებული ინფორმაცია პირდაპირ არ უარყო. ფორმულასთან კომენტარში წულუკიანმა თქვა, თუ იქნება შემოთავაზება, კულტურის მინისტრობაზე დაფიქრდება.

მისი თქმით, მას შემდეგ, რაც კულტურის სამინისტრო, როგორც დამოუკიდებელი უწყება გაუქმდა და რამდენიმე სამინისტრო გაერთიანდა, კულტურის სფეროს ინტერესები "ჩაიკარგა" სხვა სფეროებში და სამთავრობო გუნდს ამის გამოსასწორებლად უმსჯელია.