ვიცე-პოლკოვნიკი გია ცერცვაძე საპატიმროდან გათავისუფლების შემდეგ ტელეკომპანია რუსთავი 2-თან ექსკლუზიურ ინტერვიუში ამბობს, რომ რუსეთს სურს აგვისტოს ომის მონაწილეები დასაჯოს და სტრატეგიულად მნიშვნელოვანი ინფორმაცია მოიპოვოს მათგან:

"რუსეთის ამოცანაა, მაქსიმალურად აიყვანოს ის პირები, ვისაც ჰქონდა და აქვს ინფორმაცია საქართველოს უსაფრთხოებაზე, ანუ სტრატეგიული ობიექტების საბრძოლო დანაყოფებზე და ყველაფერზე, რაც საქართველოს საიდუმლოებას წარმოადგენს. მეორე მოტივი ის არის, რომ უნდათ დასაჯონ ის ხალხი, ვინც აქტიურად მონაწილეობდა რუსეთის წინააღმდეგ ბრძოლებში".

უკრაინის გენერალურმა პროკურატურამ ქართველი ჯარისკაცი გია ცერცვაძე გუშინ, 26 იანვრის საღამოს გაათავისუფლა საპატიმროდან. სასამართლომ მასზე აღმკვეთი ღონისძიება შეცვალა, თუმცა საქმე ჯერ არ დახურულა.

ვიცე-პოლკოვნიკი, გია ცერცვაძე, რომელიც რუსთავი 2-ის ინფორმაციით აფხაზეთის ომში, ასევე 2008 წელს, რუსეთის თავდასხმისას, საქართველოსთვის იბრძოდა, 1 კვირის წინ უკრაინაში, ინტერპოლის მოთხოვნით დააპატიმრეს.