თბილისის მერმა, კახა კალაძემ გადაიფიქრა და განათებებს ე.წ. კომენდანტის საათის დროსაც ჩართულს დატოვებს. კალაძემ ამის მიზეზად მოქალაქეების მოთხოვნა დაასახელა და ამბობს, რომ ითვალისწინებს იმ ხალხს, ვინც გადაადგილების შეზღუდვის დროსაც მუშაობს და მათ სტრესსა და დაღლილობას განათებული ქალაქი "მალამოდ დაედება, გაათბობს და იმედით აავსებს".

კალაძის თქმით, ფეისბუქგვერდზე არაერთმა ადამიანმა მიწერა და თხოვა, რომ განათებები არ გაეთიშათ და მერიაში იმსჯელეს იმაზე, თუ ვინ ხედავს ღამით ამ განათებებს და რატომ არის მნიშვნელოვანი, ისინი ჩართული იყოს.

"ახლა ვმსჯელობდით ამ განათებებს ნახულობს ის ადამიანები, ვინც ბრძოლის წინა ხაზზე არიან და პირდაპირ შემიძლია ვთქვა, ყველაზე სტრესულ მდგომარეობაში.

ეს არის ჩვენი ექიმები, რომლებიც მსჯელობენ ჩვენს ჯანმრთელობაზე; ეს არის ჩვენი პოლიციელები, რომლებიც ზრუნავენ ჩვენს უსაფრთხოებაზე, წესრიგზე; ეს არის ჟურნალისტები; ეს არის თბისერვისის თანამშრომლები; ჩვენი მეხანძრე-მაშველები; სხვადასხვა გადაუდებელი საქმის გამო ქუჩაში მყოფი თბილისელები; ოჯახები, რომელთა ფანჯრებიდან, აივნებიდან მოჩანს იმედიანი ქალაქი, საახალწლოდ მორთული, გამხიარებული და ულამაზესი თბილისი.

თითქოს თბილი და მყუდრო ქუჩები ამ ადამიანების დაღლილობას, სტრეს მალამოდ დაედება, გაათბობს და იმედით აღავსებს. შესაბამისად, ჩვენ ვითვალისწინებთ ამ მოთხოვნებს, თითოეული თბილისელის სურვილს, დარჩეს ჩვენი ქალაქი განათებული და დღეიდან ქალაქში საახალწლო ილუმინაციები არ გამოირთვება", — განაცხადა მან.

თბილისის მერმა სულ რაღაც 2 დღის წინ, 17 დეკემბერს თქვა, რომ განათებები გადაადგილების შეზღუდვის დროს, ანუ საღამოს ცხრა საათიდან დილის ხუთამდე გათიშული იქნებოდა, რადგან მოსახლეობა მის ნახვას ვერ შეძლებდა. მისი თქმით, ამ დროს ანთებული მხოლოდ ნაძვის ხე იქნებოდა.