ჯანდაცვის მინისტრის, ეკატერინე ტიკარაძის თქმით, მათი მოწოდებაა, რომ 24 დეკემბრიდან შეზღუდვები მინიმალურად მოიხსნას. მინისტრის განცხადებით, ის სტაბილიზაცია, რომელიც დღეს არის მიღწეული, დიდი ოპტიმიზმის საფუძველს არ იძლევა.

"აქედან გამომდინარე ჩვენ, პირველ რიგში, გვექნება კერძო სექტორთან კომუნიკაცია იმასთან დაკავშირებით, თუ როგორ შეძლებენ ყველა იმ მითითების შესრულებას, რომელიც ეპიდემიოლოგებსა და შრომითი უსაფრთხოების სამსახურს ექნება. ჩვენი მოწოდებაა, შეზღუდვები მინიმალურად მოიხსნას", — განაცხადა ტიკარაძემ ჯანმრთელობის მსოფლიო ორგანიზაციის ევროპის რეგიონული დირექტორის, ჰანს კლუგესთან ერთობლივ ბრიფინგზე.

18 დეკემბრის მონაცემებით, საქართველოში კორონავირუსის 2 635 ახალი შემთხვევა გამოვლინდა, გამოჯანმრთელდა — 2 244, გარდაიცვალა 49 ადამიანი.

ქვეყანაში კოვიდ-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა 204 003-ს შეადგენს. გამოჯანმრთელებულთა რაოდენობა 171 526-მდე გაიზარდა. პანდემიის გავრცელებიდან დღემდე ვირუსს ჯამში 2 002 პირი ემსხვერპლა.