ქართული ოცნების ერთ-ერთი ლიდერის, ირაკლი კობახიძის განცხადებით, პარტია გირჩსა და მოქალაქეებს ჰქონდათ რაციონალური და ლოგიკური მსჯელობა პარტიულ დაფინანსებასთან დაკავშირებით და მათ უარი თქვეს საბიუჯეტო დაფინანსებაზე. კობახიძის თქმით, სხვა პარტიებმა "ცდუნებას ვერ გაუძლეს" და საბიუჯეტო დაფინანსება მოითხოვეს.

"თუ პოლიტიკური პარტია უპირისპირდება დემოკრატიულ ინსტიტუტებს და დემოკრატიულ სისტემას, მაშინ ის ვერ ისარგებლებს იმ პრივილეგიებით, რომლებიც დაკავშირებულია პოლიტიკურ პროცესებში ჩართულობასთან. თუ ამ ჩართულობის წინააღმდეგ გამოდის, ბუნებრივია, შესაბამისი პრივილეგიებით არ უნდა ისარგებლოს. აქ თქვენ შეგახსენებთ, რომ ჯანსაღი პოზიცია ჰქონდა ორ პოლიტიკურ პარტიას: ეს იყო გირჩი და ეს იყო მოქალაქეები. მათ თქვეს, რომ თუ ვინმე არ აღიარებს არჩევნების შედეგებს და არ მონაწილეობს საპარლამენტო ცხოვრებაში, მაშინ არც უნდა დაწეროს განცხადება დაფინანსებასთან დაკავშირებით. მათ რაციონალური, ლოგიკური მსჯელობა შესთავაზეს თავიანთ კოლეგებს ოპოზიციიდან. სხვებს არ ეყოთ გამბედაობა, ცდუნებას ვერ გაუძლეს და დაწერეს განცხადებები დაფინანსებასთან დაკავშირებით, რაც სამარცხვინოა", — ამბობს კობახიძე

ცენტრალური საარჩევნო კომისიის თავმჯდომარის, თამარ ჟვანიას 11 დეკემბრის განკარგულებით, პარტიების მიერ წარდგენილი წინასწარი წერილობითი თანხმობის საფუძველზე, სახელმწიფო ბიუჯეტიდან დაფინანსებას 12 ბარიერგადალახული პარტია მიიღებს.

დაფინანსებულ პარტიათა შორის არ იქნება მოქალაქეები და გირჩი, რადგან მათ ცესკოსთვის შესაბამისი განცხადებით არ მიუმართავთ.