ქართული ოცნების აღმასრულებელი მდივნის, ირაკლი კობახიძის განცხადებით, ნაციონალურ მოძრაობაში არიან წევრები, რომლებსაც სურთ პარლამენტში შესვლა, მაგრამ ისინი ბულინგისა და შანტაჟის მსხვერპლნი არიან.

"ნაციონალური მოძრაობის შიგნით არის გარკვეული მიმართულებები, რომლებსაც აქვთ პარლამენტში შემოსვლის ინტერესი, უბრალოდ დღემდე ისინი ექვემდებარებიან ბულინგსა და შანტაჟს. ისინი ამაზე ღიადაც საუბრობენ. არაერთ, პოლიტიკური სუბიექტია თვითონ ამ ბლოკის შიგნით და, ასევე, კონკრეტული დეპუტატები არიან რომლებსაც სურთ პარლამენტში შესვლა, მაგრამ ხდება ბულინგი სააკაშვილის ბოკერიას და გვარამიას მხრიდან, სხვდასხვა ვითარებით, ზოგი სატელევიზო მიმართულებით, ზოგი სოციალური ქსელებით. ასეთ ვითარებაში პოლიტიკოსებს უჭირთ გადაწყვეტილების მიღება, თუმცა ნაციონალური მოძრაობის შიგნითაც ჩანს რომ არის გარკვეული სივრცე საუბრისთვის", — ამბობს კობახიძე.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიციურ პარტიებს შორის მოლაპარაკებები მიმდინარეობს. ოპოზიცია მოითხოვს ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია. ქართულ ოცნებაში ამბობენ, რომ რიგგარეშე არჩევნების ჩატარების საკითხი არ განიხილება.