საქართველოს ჯანდაცვის მინისტრის, ეკატერინე ტიკარაძის განცხადებით, მათ გუნდში არის ხალხი, რომელიც დაინტერესებულია, რომ საქართველოს ჰყავდეს "ცუდი" ჯანდაცვის მინისტრი. ასე უპასუხა ტიკარაძემ მის მიმართ დაწყებული ნეგატიური კამპანიის შესახებ დასმულ შეკითხვას: "როგორ ფიქრობთ, გუნდში ვერ აიტანა ვინმემ თქვენი პირადი წარმატება?"

"არც ჟურნალისტური და არც პირადი გამოძიება არ ჩამიტარებია, გუნდში მოხდა თუ არა ეს ვერატანა, მაგრამ ფაქტი არის და ეს განცდა ნამდვილად მაქვს. მე მქონდა იმის მოლოდინი, რომ არაერთი ადამიანის ინტერესებზე მოხდებოდა გადაკვეთა, და ეს ნამდვილად მოხდა. შესაბამისად, რა თქმა უნდა, არის ამაში გარკვეული სიმართლე — არის ხალხი, რომელიც დაინტერესებულია, რომ საქართველოს ჰყავდეს ცუდი ჯანდაცვის მინისტრი, რომელიც თავისი კომპეტენციებით თავს ვერ ართმევს იმ დაკისრებულ ვალდებულებას, რომელიც მას დღეს აქვს", — განაცხადა ტიკარაძემ რადიო იმედის ეთერში.

მისი თქმით, შესაძლოა ეს ადამიანები მაღალ თანამდებობებზე არ იყვნენ, თუმცა მათ საკმაოდ "დიდი ბიზნესინტერესები" აქვთ.