განახლებადი ენერგიის ნორვეგიული კომპანია, Clean Energy საქართველოში ჰიდროელექტროსადგურის ასაშენებლად ინვესტიციების განხორციელებას გეგმავს. ნორვეგიული მედიის ცნობით, ეს ჰიდროელექტროსადგური უდიდესი იქნება საზღვარგარეთ აშენებულ ნორვეგიულ ელექტროსადგურებს შორის.

საქართველოს ენერგეტიკის განვითარების ფონდმა 2015 წლის 24 დეკემბერს გამოაცხადა ტენდერი ნამახვან ჰესების კასკადის პროექტის მშენებლობა-ოპერირება-ფლობის მიზნით.

კომპანიამ ქლინ ენერჯიმ საქართველოში გამოცხადებულ ტენდერში გასულ კვირას გაიმარჯვა. თურქულ ინდუსტრიულ კომპანია ენკასთან თანამშრომლობით, იგი ააშენებს ელექტროსადგურს, რომელიც გეგმით, წლიურად 1,5-1,6 ტერავატ/სთ ენერგიას გამოიმუშავებს.

ნამახვან ჰესების კასკადის პროექტი ხორციელდება წყალტუბოსა და ცაგერის მუნიციპალიტეტების ტერიტორიაზე, მდინარე რიონზე, ლაჯანურისა და გუმათის ჰესებს შორის. ენერგეტიკის განვითარების ფონდის ცნობით, ჰესების პროექტი მოიცავს ორსაფეხურიან კასკადს და შედგება ნამახვანისა და ტვიში ჰესებისაგან, რომელთა ჯამური დადგმული სიმძლავრეა 433 მეგავატი.

პროექტის საერთო ღირებულება 7-8 მილიარდი ნორვეგიული კრონია (დაახლოებით 960 მილიონი აშშ დოლარი) და მისი დასრულება 5 წელიწადში იგეგმება.

ამჟამად მიმდინარეობს მოლაპარაკებები საქართველოს მთავრობასთან ხელშეკრულების პირობებთან დაკავშირებით.

უნდა ავაშენოთ თუ არა დიდი ჰესები?