თბილისის მერის, კახა კალაძის განცხადებით, ის ტერიტორიები, სადაც დემონტაჟი მოხდა, მთელი ქვეყნის, ადამიანების ქონებაა. ამის შესახებ მან რუსთავი 2-ის ეთერში ისაუბრა.

"ეს ხომ ჩემი საკუთარი მიწები არ არის. ეს არის ჩვენი ქვეყნის, თითოეული თქვენგანის ქონება. როდესაც მიწების დატაცება და უკანონო შენობა-ნაგებობების განთავსება ხდება, ეს მიდგომა კატეგორიულად მიუღებელია", — თქვა კალაძემ.

დღეს თბილისში, აფრიკის დასახლებაში, ადგილობრივ მოსახლეობასა და პოლიციას შორის ფიზიკური დაპირისპირება იყო. მერიის ზედამხედველობის სამსახურმა იქ არსებული შენობა-ნაგებობების დემონტაჟი მოახდინა, რასაც მოსახლეობა ხელს უშლიდა.

პოლიციამ დააკავა რამდენიმე აქტივისტი. მოსახლეობის ნაწილი პოლიციას ქვას ესვროდა. ადილობრივები ცდილობდნენ, პოლიციის კორდონს ხელოვნური ბარიერი აღემართათ და გადაადგილების საშუალება არ მიეცათ.

აღნიშნულ ფაქტთან დაკავშირებით თბილისის მერმა, კახა კალაძემ განაცხადა, რომ იმ ხალხს აქვს სახლი და მიწა და ეს არის მიწების მიზანმიმართული დატაცება.

"იქ არავინ არ ცხოვრობს, ეს არის დატაცებული მიწები. მიზანმიმართულად ხდება ამ კონკრეტული ტერიტორიების დაკავება, გარკვეული შენობა-ნაგებობების განთავსება, რომ შემდეგ, წლების მერე მოახდინონ ამ მიტაცებული მიწების მითვისება, რაც კატეგორიულად მიუღებელია. ესენი არიან ის ადამიანები, რომელთაც აქვთ სახლები, არიან ის ადამიანები, რომელთაც აქვთ მიწები და ა.შ. არ გამოვრიცხავ, ამის უკან იყვნენ გარკვეული ჯგუფები, რომლებიც ხელს ითბობენ ამაზე", — განაცახად კახა კალაძემ.

რამდენიმე კვირით ადრე ადამიანის უფლებათა სწავლებისა და მონიტორინგის ცენტრმა (EMC) მოუწოდა თბილისის მერიას, არ დაიწყოს მუნიციპალიტეტის ტერიტორიაზე უკანონოდ აშენებული შენობების დემონტაჟი და სახლ-კარის გარეშე არ დატოვოს იქ მცხოვრები ადამიანები.

EMC-ს თქმით, უნებართვოდ აშენებული შენობები, ხშირად, ერთადერთი თავშესაფარია იქ მცხოვრები ადამიანებისთვის და ქალაქის მერის, კახა კალაძის განცხადება, მსგავსი შენობების სასწრაფო დემონტაჟის შესახებ, საფრთხეს უქმნის ადამიანების ჯანმრთელობას და არღვევს ადამიანის უფლებების მინიმალურ სტანდარტებს.